تھریڈز کو آخرکار یورپ میں متعارف کرا دیا گیا

14 دسمبر ، 2023

تھریڈز کو یورپ سے ہٹ کر باقی دنیا میں جولائی میں متعارف کرایا گیا تھا / اے ایف پی فوٹو

میٹا کی جانب سے نئی سوشل میڈیا ایپ تھریڈز کو جولائی میں دنیا بھر میں متعارف کرایا گیا تھا مگر اس وقت یورپ میں اسے پیش نہیں کیا گیا تھا۔

اب 5 ماہ بعد آخر کار اسے یورپی یونین میں بھی متعارف کرا دیا گیا ہے۔

تھریڈز میں ایک پوسٹ کے دوران میٹا کے چیف ایگزیکٹو مارک زکربرگ نے اس سوشل میڈیا پلیٹ فارم کو یورپ میں متعارف کرانے کا اعلان کیا۔

انہوں نے کہا کہ ہم تھریڈز کو یورپ کے مزید ممالک میں پیش کر رہے ہیں۔

یہ بھی پڑھیں

آغاز میں یورپی صارفین تھریڈز کو ویب سائٹ پر استعمال کر سکیں گے۔

یورپی صارفین پروفائل بنائے بغیر بھی تھریڈز کو استعمال کر سکیں گے، یعنی انہیں انسٹا گرام کے ذریعے لاگ ان ہونے کی ضرورت نہیں ہوگی۔

اسے یوز ود آؤٹ اے پروفائل موڈ قرار دیا گیا ہے جس کے دوران پوسٹس کو دیکھنا ممکن ہوگا مگر وہ لائیک، ری پوسٹ یا ریپلائی نہیں کرسکیں گے۔

ایسے صارفین کو صرف ایک الگورتھم فیڈ دستیاب ہوگی، جس میں وہ دیگر اکاؤنٹس کو بھی سرچ کر سکیں گے۔

خیال رہے کہ جولائی میں کمپنی کی جانب سے تھریڈز کو یورپ میں متعارف نہ کرانے کی وجہ یورپی یونین کا پرائیویسی قانون تھا۔

اس موقع پر میٹا کی جانب سے یورپی یونین سے تعلق رکھنے والے افراد کو وی پی این کے ذریعے تھریڈز تک رسائی سے روکنے کے لیے بھی اقدامات کیے گئے تھے۔

تھریڈز کے ماہانہ صارفین کی تعداد 10 کروڑ کے قریب ہے اور کمپنی کو توقع ہے کہ یورپ میں اسے متعارف کرانے سے سوشل میڈیا پلیٹ فارم استعمال کرنے والوں کی تعداد میں اضافہ ہوگا۔

مارک زکربرگ نے یہ بھی اعلان کیا کہ مستقبل قریب میں تھریڈز پوسٹس ڈی سینٹرلائزڈ نیٹ ورکس جیسے Mastodon میں بھی نظر آئیں گی۔