کھیل

میری کتاب میں کوئی معافی نہیں، عامر کی انٹرنیشنل کرکٹ میں واپسی پر رمیز راجا کا ردعمل

07 اپریل ، 2024

جب عامر فکسنگ میں ملوث ہوئے تو میں لارڈز ٹیسٹ میں کمنٹری کر رہا تھا اور میں اپنی جانب آنے والی نفرت کو محسوس کر رہا تھا کیونکہ میں فکسرز کی نشاندہی کر رہا تھا: رمیز راجا__فوٹو: فائل

پاکستان کرکٹ بورڈ (پی سی بی) کے سابق چیئرمین رمیز راجا نے فاسٹ بولر محمد عامر کی انٹرنیشنل کرکٹ میں واپسی پر مایوسی کا اظہار کیا ہے۔

نجی ٹی وی چینل کے پروگرام میں گفتگو کرتے ہوئے رمیز راجا نے محمد عامر کی انٹرنیشنل کرکٹ میں واپسی کے بارے میں اظہارِ خیال کیا۔

انہوں نے کہا کہ ’عامر کے بارے میں میری رائے بالکل واضح ہے، اگرچہ اس کے لیے ہمدردی ہوسکتی ہے لیکن میری کتاب میں محمد عامر کے لیے کوئی معافی نہیں ہے‘۔

رمیز راجا نے کہا کہ ’جب عامر فکسنگ میں ملوث ہوئے تو میں لارڈز ٹیسٹ میں کمنٹری کر رہا تھا اور میں اپنی جانب آنے والی نفرت کو محسوس کر رہا تھا کیونکہ میں فکسرز کی نشاندہی کر رہا تھا، مجھے میڈیا نے جتنی نفرت کا نشانہ بنایا میں وہ بھول نہیں سکتا‘۔

یہ بھی پڑھیں

سابق چیئرمین کا کہناتھا کہ 'دنیا میں جہاں بھی فکسنگ کرنے والے کرکٹرز پائے جاتے ہیں انہیں نکال دیا جاتا ہے، اگر خدانخواستہ میرا بیٹا بھی کچھ ایسا کرتا تو میں اس سے تعلق ختم کردیتا'۔

خیال رہے کہ محمد عامر پر 2010 میں اسپاٹ فکسنگ کیس میں انٹرنیشنل کرکٹ کونسل (آئی سی سی) نے محمد آصف اور سلمان بٹ سمیت پانچ سال کے لیے بین الاقوامی کرکٹ کھیلنے پر پابندی عائد کر دی تھی۔

2016 میں محمد عامر کی کرکٹ میں واپسی ہوئی تھی، فاسٹ بولر نے دسمبر 2020 میں ریٹائرمنٹ کا اعلان کیا تھا۔

واضح رہے کہ پاکستان سپر لیگ (پی ایس ایل) 2024 کا سیزن ختم ہونے کے بعد محمد عامر نے آئی سی سی ٹی20 ورلڈ کپ 2024 کے لیے اپنی ریٹائرمنٹ واپس لے لی ہے جس کے بعد انہیں پاک فوج کے زیرنگرانی ہونے والے فٹنس کیمپ کا حصہ بنایا گیا۔

یاد رہے کہ آئی سی سی ٹی20 ورلڈ کپ رواں برس جون میں ویسٹ انڈیز اور امریکا میں کھیلا جائے گا۔