24 اپریل ، 2024 
کراچی کی شارع فیصل سمیت مختلف سڑکوں کو ٹریفک کیلئے کھول دیا گیا
24 اپریل ، 2024
ایرانی صدر کی کراچی آمد کے موقع پر عام ٹریفک کیلئے بند کی گئی شارع فیصل سمیت مختلف سڑکوں کو عام ٹریفک کیلئے کھول دیا گیا ہے۔
ٹریفک پولیس کے مطابق شارع فیصل اور ایم اے جناح روڈ سمیت شارع قائدین سے نمائش آنے والی سڑک بھی بحال کردی گئی ہے۔
ٹریفک پولیس کے مطابق کراچی کی مختلف اہم سڑکوں سے کنٹینرز اٹھا کر ایک طرف رکھ دیئے گئے ہیں۔
دوسری جانب ضیا الدین احمد روڈ ٹریفک کیلئے تاحال بند ہے جبکہ میٹروپول سگنل سے پی آئی ڈی سی آنے اور جانے والی سڑک بھی بند ہے۔
یاد رہے کہ گزشتہ روز ایرانی صدر کے دورہ کراچی کے موقع پر شہر کی مختلف سڑکوں کو کنٹینر لگا کر اور رکاوٹیں کھڑی کرکے عام ٹریفک کیلئے بند کیا گیا تھا۔
ایرانی صدر کے دورے کے موقع پر ٹریفک پولیس کی جانب سے شہریوں کی سہولت کیلئے متبادل ٹریفک پلان بھی جاری کیا گیا تھا۔
