'مودی کو ووٹ نہ دو' عامر خان اور رنویر سنگھ بھی ڈیپ فیک ویڈیو کا نشانہ بن گئے
25 اپریل ، 2024
بھارت میں انتخابات کے دوران ڈیپ فیک ویڈیوز نے بھی انٹری ماردی، بالی وڈ اداکار عامر خان کے بعد رنویر سنگھ بھی آرٹیفیشل انٹیلی جنس کے ذریعے بنائی گئی جعلی ویڈیوز کا نشانہ بن گئے۔
بھارت کے انتخابات میں ووٹروں کو متاثر کرنے کے لیے آرٹیفیشل انٹیلی جنس سے جعلی ویڈیوز بنانے کا انکشاف ہوا ہے۔
گزشتہ دنوں سوشل میڈیا پر عامر خان اور رنویر سنگھ کی جعلی ویڈیوز میں ووٹروں کو کہا گیا کہ وہ مودی کو ووٹ نہ دیں، ویڈیوز میں اداکاروں کو موجودہ حکومت کی پالیسیوں پر تنقید کرتے ہوئے بھی دکھایا گیا تھا۔بعد ازاں ویڈیوز سوشل میڈیا سے ہٹادی گئی ہیں۔
دوسری جانب عامر خان اور رنویرسنگھ نے ویڈیوز کو جعلی قرار دیتے ہوئے ایف آئی آر درج کرادی ہیں۔
رنویر سنگھ نے سوشل میڈیا پر اپنے پیغام میں کہا کہ مداح اس قسم کی ڈیپ فیک ویڈیوز سے بچیں۔
اس سے قبل بھارتی انتخابات میں آرٹیفیشل انٹیلی جنس کی مدد سے ہی مشہور اور معروف آنجہانی سیاست دان اپنی جماعتوں کی حمایت میں سامنے آگئے تھے۔
2016 میں انتقال کرنے والی جے للیتا کا اپنی پارٹی کی حمایت میں آڈیو پیغام ووٹرز کو حیران کرگیا تھا۔یہ آڈیو پیغام آرٹیفیشل انٹیلی جنس کی مدد سے تیار کیا گیا تھا۔
دوسری جانب جےللیتا کی مخالف پارٹی بھی پیچھے نہ رہی اور 2018 میں انتقال کرنے والے ایم کروناندھی کا اے آئی سے بنایا ویڈیو پیغام بھی جاری کردیا تھا۔پیغام میں کروناندھی نے اپنے بیٹے اور تامل ناڈوکے موجودہ وزیر اعلیٰ کےلیے عوام سے حمایت مانگی۔
ادھر تجزیہ کاروں نے اے آئی کی مدد سے آواز اور ویڈیو کے استعمال پر تشویش کا اظہار کرتے ہوئے کہا ہے کہ ٹیکنالوجی کے استعمال سے لوگوں کے لیے سچ اور جھوٹ میں فرق کرنا مشکل ہوجائے گا۔
واضح رہے کہ لوک سبھا کی 543 نشستوں کیلئے عام انتخابات کا آغاز 19 اپریل سے ہوگیا ہے۔ بھارتی ریاستوں میں 7 مرحلوں میں ووٹنگ ہوگی جس کا اختتام یکم جون کو ہوگا۔
