کھیل

کرکٹ بورڈ خود کو بچانے کیلئے کھلاڑیوں کو آمنے سامنے لاکر کھڑا نہ کرے: شاہد آفریدی

29 جولائی ، 2024

کرکٹ بورڈ خود کو بچانے کیلئے کھلاڑیوں کو آمنے سامنے لاکر کھڑا نہ کرے: شاہد آفریدی — محسن نقوی کے پاس پی سی بی اور وزارت داخلہ بھی ہے لہٰذا اب انہیں ایک فیصلہ کرلینا چاہیے کہ ایک عہدہ چن لیں: سابق کپتان—فوٹو: فائل

قومی کرکٹ ٹیم کے سابق کپتان شاہد آفریدی نے کہا ہے کہ اپنے آپ کو بچانے کے لیے کھلاڑیوں کو آمنے سامنے لانا درست نہیں لہٰذا کرکٹ بورڈ خود کو بچانے کے لیے کھلاڑیوں کو آمنے سامنے لاکر کھڑا نہ کرے۔

میڈیا سے گفتگو میں شاہد آفریدی نے کہا کہ پاکستان کرکٹ بورڈ کھلاڑیوں کے لیے ایک باپ کی حیثیت رکھتا ہے، میں پاکستان ٹیم کے لیے 20 سے 22 سال کھیل چکا ہوں، میرے دور پر مسائل بہت رہے ہیں۔

یہ بھی پڑھیں

انہوں نے کہا کہ محسن نقوی کے پاس پی سی بی اور وزارت داخلہ بھی ہے لہٰذا اب انہیں ایک فیصلہ کرلینا چاہیے کہ ایک عہدہ چن لیں اور چیئرمین پی سی بی ایڈوائزر کے کہنے پر چلیں گے تو وہ کچھ نہیں کرسکتے۔

سابق کپتان کا کہنا تھا کہ چیئرمین پی سی بی کے ایڈوائزر کو کرکٹ کے بارے میں علم نہیں ہے، ایڈوائزر انہیں درست سمت کی جانب لے کر نہیں جاسکیں گے، چیئرمین پی سی بی کے ایڈوائزر اس قابل نہیں۔

میرے کرکٹ تبصروں کو منفی لیا جاتا ہے اس وجہ سے بات کرنا چھوڑ دی ہے: شاہد آفریدی

شاہد آفریدی نے مزید کہا کہ میرے بیانات سے شاہین آفریدی پر اثر پڑتا ہے اور لوگ منفی باتیں کرتے ہیں اس وجہ سے بولنا چھوڑ دیا ہے، شاہین کی تعریف میں بہت کم کرتا ہوں، میں صرف شاہین کو ڈانٹتا نظر آؤں گا کیونکہ میری جب بھی کوئی بات ہوتی ہے تو منفی سوچ بنا لی جاتی ہے۔

سابق کپتان نے کہا کہ بھارت کے شہروں میں ہم مشکل حالات میں بھی جاتے رہے ہیں اور دھمکیوں کے باوجود بھی ہم کھیل چکے ہیں، بہرحال اگر آپ نہیں آنا چاہتے ہیں پاکستان تو مت آئیں۔

ان کا کہنا تھا کہ شکست ہوتی ہے تو سب ذمہ دار ہوتے ہیں، ایک دو سلیکٹر کو ہٹاکرکچھ نہیں ہوگا، ہاتھ کھڑا کرکے کھلاڑیوں کا انتخاب کیا جارہا تھا، یہ کیا ہورہا تھا۔