لاپتہ افرادکےنام پر دھرنا دینے والے بلوچستان میں بہائےخون ناحق پر بھی بولیں، خواجہ آصف

وزیر دفاع  خواجہ آصف  نےکہا ہےکہ لاپتہ افراد کے نام  پر دھرنا دینے والے اور  جلوس نکالنے والے بلوچستان میں بہائے خون ناحق پر بھی بولیں اور  احتجاج کریں۔

 پارلیمنٹ ہاؤس میں جیو نیوز  سےگفتگو کرتے ہوئے  وزیر دفاع  خواجہ آصف کا کہنا تھا کہ  بلوچستان  میں  پہلے بھی دوسرے صوبوں  سے جا کرکام کرنے والوں کو  شہید کیا جاتا تھا، غریب لوگ روزی کی تلاش میں وہاں پر جاتے ہیں۔

خواجہ آصف کا کہنا تھا کہ یہ بلوچ علیحدگی پسند تنظیموں کی کارروائیاں ہیں، ان واقعات کی جتنی مذمت کی جائے کم ہے، اس کا لازمی ری ایکشن ہوگا، ناحق لوگوں کا خون بہانے والوں کو کیفر کردار  تک پہنچائیں گے۔

ان کا کہنا تھا کہ کیا بلوچستان میں دوسرے پاکستانیوں کے کوئی حقوق نہیں ہیں، ایک وقت تھا پنجاب، سندھ اور دیگر صوبوں سے لوگ وہاں جا کر ملازمت کرتے تھے، اسلام آباد میں آکر لاپتہ افراد کے نام پر دھرنے دیے جاتے ہیں،کسی کو توفیق نہیں ہوتی کہ یہ جو خون بہایا جارہا ہے اس کی بھی مذمت کریں،  وہاں پر  بے گناہ لوگوں کو  بسوں سے اتار کر مارا جا رہا ہے۔

خواجہ آصف کا کہنا تھا کہ کوئی بھی تحریک ڈبل اسٹینڈرڈ سے کامیاب نہیں ہوتی، ناحق خون آپ سڑکوں پر بہا رہے ہیں، لاپتا افراد میں کوئی دبئی بیٹھا ہےکوئی دوسرے ملکوں میں، پنجاب میں سارے صوبوں کے لوگ ملازمت کرتے ہیں، پنجاب نے اپنا دامن کھلا رکھا ہے،  پنجاب کی سرزمین سارے پاکستانیوں کی ملکیت ہے، پاک سرزمین  پر سب کے ایک  جیسے حقوق ہیں۔