30 اگست ، 2024 
خیبر پختونخوا کے 4 اضلاع سے 19 سالوں میں لاپتا افراد کے 54 مقدمات درج ہوئے
30 اگست ، 2024
خیبرپختونخوا کے چار جنوبی اضلاع سے گذشتہ 19 سالوں کے دوران رشتہ داروں نے مختلف پولیس اسٹیشنز پر لاپتا افراد کے 54 مقدمات میں درج کروائے۔
جیو نیوز کو موصول ہونے والی خیبرپختونخوا کے چارجنوبی اضلاع سے لاپتا 54 افراد کی فہرست کے مطابق لاپتہ افراد کا تعلق بنوں، شمالی وزیرستان اور لکی مروت سے ہے
دستاویزات میں کہا گیا ہے کہ لکی مروت، بنوں اور شمالی و جنوبی وزیرستان سے گزشتہ 19 سالوں میں دو بھائیوں سمیت 54 افراد کے رشتہ داروں نے مختلف پولیس اسٹیشنز میں لاپتا افراد کے مقدمات درج کئے۔
دستاویز کے مطابق لسٹ میں 48 افراد کا تعلق بنوں جبکہ شمالی وزیرستان اور لکی مروت سے 3-3 لاپتا افراد شامل ہے اور جنوبی وزیرستان سے ایک لاپتا شخص کی رپورٹ درج ہوئی۔
جیو نیوز کو موصول ہونے والی دستاویز کے مطابق رواں سال مختلف تھانوں میں 25 لاپتا افراد کے مقدمات درج ہوئے۔
سرکاری حکام کے مطابق لاپتا افراد کی شناختی کارڈ اور دیگر معلومات اکٹھی کی گئیں۔
واضح رہے کہ گزشتہ روز کیس کی سماعت کے دوران لاہور ہائیکورٹ راولپنڈی بینچ ریمارکس دیے تھے کہ مسنگ پرسنز کا مسئلہ کافی سنگین ہو چکا ہے، پتہ چلتا ہے بندہ یہاں مسنگ ہے لیکن افغانستان بیٹھا ہوا ہے۔
جسٹس مرزا وقاص رؤف نے ریمارکس دیے کہ ہر کسی کو اپنا کردارادا کرنا ہے، سب اللہ تعالیٰ کو جواب دہ ہیں، مسنگ ایشو کافی الارمنگ ہو چکا ہے، پتہ چلتا ہےبندہ یہاں مسنگ ہے لیکن افغانستان بیٹھا ہوا ہے۔
