دنیا

آرڈر میں تاخیر کیوں ہوئی؟ خاتون کے جھگڑنے پر ڈیلیوری بوائے نے خودکشی کرلی

20 ستمبر ، 2024

آرڈر میں تاخیر کیوں ہوئی؟ خاتون کے جھگڑنے پر ڈیلیوری بوائے نے خودکشی کرلی — 5 دن بعد پووتھرن کمرے میں مردہ پایا گیا، اس کی لاش کے پاس خودکشی کا نوٹ بھی تھا __فوٹو: بھارتی میڈیا

بھارت میں انتہائی افسوسناک واقعہ پیش آیا جہاں ایک 19 سالہ ڈیلیوری بوائے نے گاہک کی جانب سے سخت رویہ اپنائے جانے پر دلبرداشتہ ہو کر خودکشی کرلی۔

بھارتی میڈیا رپورٹس کے مطابق یہ واقعہ چنئی میں پیش آیا جہاں 19 سال کا پووتھرن بی کام کا طالبعلم تھا جو پڑھائی کے ساتھ پارٹ ٹائم نوکری بھی کیا کرتا تھا، پولیس کے مطابق 11 ستمبر کو پووتھرن کو گروسریز کی ڈیلیوری کا آرڈر ملا۔

تاہم لڑکے کو گھر ملنے میں مشکلات کا سامنا کرنا پڑا جس کی وجہ سے آرڈر میں تاخیر ہوگئی، جب پووتھرن پہنچا تو خاتون نے اسے ڈانٹا اور بحث شروع کر دی، بعدازاں شام میں انہوں نے ڈیلیوری پلیٹ فارم پر فون کرکے پووتھرن کی شکایت کی اور کہا آئندہ اسے گروسریز کی ڈیلیوری کرنے نہ بھیجا جائے۔

یہ بھی پڑھیں

پولیس کے مطابق کمپنی نے پووتھرن کے خلاف ایکشن لیا لیکن یہ واضح نہیں کہ اسے کیا سزا دی جانی تھی۔

اس جھگڑے کے دو دن بعد پووتھرن گاہک کی رہائشگاہ پر واپس آیا اور مبینہ طور پر اس کی کھڑکی پر پتھر مار کر شیشہ توڑ دیا جس کے بعد خاتون نے پولیس میں شکایت کی، پولیس نے پووتھرن کا پتہ لگایا اور پوچھ گچھ کے لیے بلایا گیا اور سخت انتباہ جاری کیا، ایک طالبعلم کی حیثیت سے اس پر کوئی باقاعدہ ایف آئی آر نہیں کاٹی گئی۔

بعدازاں واقعے کے 5 دن بعد پووتھرن کمرے میں مردہ پایا گیا، اس کی لاش کے پاس خودکشی کا نوٹ بھی تھا جس میں اس نے تحریر کیا کہ گاہک کے ساتھ ہوئے واقعے اور پھر اس کی شکایت لگانے کی وجہ سے وہ اپنی زندگی ختم کر رہا ہے۔

پولیس کا بتانا ہے کہ ہم نے کمپنی کے خلاف کارروائی کا آغاز کردیا ہے اور تحقیقات کی جا رہی ہیں کہ آیا کمپنی کی طرف سے اس پر کسی قسم کا دباؤ تو نہیں تھا۔