ایپل اپنا سستا ترین آئی فون جلد پیش کرنے کیلئے تیار

ایپل کی جانب سے نئے سستے ترین آئی فون ایس ای کی تیاری پر کام کیا جا رہا ہے۔

بلومبرگ کی ایک رپورٹ کے مطابق ایپل کی جانب سے نئے آئی فون ایس ای پر کام کیا جا رہا ہے جسے 2025 میں متعارف کرایا جا سکتا ہے۔

یہ ایس ای سیریز کا چوتھا آئی فون ہوگا۔

یہ نیا آئی فون ایس ای بنیادی طور پر آئی فون 14 پر مبنی ہوگا یعنی اس میں ہوم بٹن موجود نہیں ہوگا جبکہ اس میں فیس آئی ڈی کے آپشن کا اضافہ کیا جائے گا۔

فون کے اندر کمپنی کے نئے پراسیسرز میں سے ایک موجود ہوگا جس کا مطلب یہ ہے کہ آئی فون ایس ای میں ایپل انٹیلی جنس نامی آرٹی فیشل انٹیلی جنس ماڈل پر مبنی فیچرز بھی دستیاب ہوں گے۔

ایپل کے نئے سستے ترین آئی فون کی پہلی جھلک سامنے آگئی

تصویر کو دیکھ کر عندیہ ملتا ہے کہ اس نئے فون کا فرنٹ آئی فون 14 سے ملتا جلتا ہوگا۔

ابھی یہ واضح نہیں کہ فون کے بیک پر 2022 کے آئی فون ایس ای 3 کی طرح 12 میگا پکسل کیمرا ہوگا یا اس بار زیادہ طاقتور کیمرا ڈیوائس کا حصہ بنایا جائے گا۔

خیال رہے کہ ابھی آئی فون ایس ای (2022) اس کمپنی کا سستا ترین فون ہے، جو 429 ڈالرز میں فروخت کیا جا رہا ہے۔

رپورٹ میں بتایا گیا کہ اس نئے آئی فون ایس ای کے ساتھ کمپنی کی جانب سے 2 نئے آئی پیڈ ائیر ماڈلز اور میجک کی بورڈ کے نئے ورژن پر بھی کام کیا جا رہا ہے۔