29 جنوری ، 2025 
پاکستانی پاسپورٹ، ہر ہفتے 3 ہزار ڈالر چاہئیں، نوجوان کی محبت میں آئی امریکی خاتون کے مطالبات
29 جنوری ، 2025
پاکستانی نوجوان کی محبت میں کراچی آئی امریکی خاتون گارڈن میں واقع لڑکےکےگھر پہنچ گئی تاہم نوجوان کے اہلخانہ گھر بند کرکےکہیں چلےگئے۔
19 سالہ نوجوان ندال احمد میمن کے گھر میں کوئی نہ ملا تو امریکی خاتون نے وہیں دھرنا دے دیا اور واپس جانے سے انکار کردیا۔خاتون عمارت کی پارکنگ میں بیٹھ گئی، عمارت کی انتظامیہ نے فلیٹ کےدروازے بند کردیے ۔
اس موقع پر ایک صحافی نے امریکی خاتون سے سوال کیا کہ آپ کس نوجوان سے شادی کرنا چاہتی ہیں؟اس پر امریکی خاتون نے جواب دیا کہ 3 ہزار ڈالر دیں پھربتاؤں گی۔
جیو نیوز سے گفتگو میں امریکی خاتون نے حکومت سے مطالبہ کیا کہ اسے پاکستانی شہریت اور ہر ہفتے 3 ہزار امریکی ڈالر دیے جائیں۔
خاتون سے مذاکرات کے لیے ایس ڈی پی او کلفٹن فائزہ سوڈھر نے ملاقات کی جس کے بعد امریکی خاتون کو ویمن پولیس اسٹیشن منتقل کردیا گیا۔ پولیس کا کہنا تھا کہ امریکی خاتون کو سکیورٹی کی ضرورت ہے، بظاہر اس کی ذہنی حالت بھی ٹھیک نہیں۔
تاہم بعد ازاں امریکی خاتون کے اصرار پر انہیں واپس گارڈن کے علاقے میں پہنچادیا گیا۔
پولیس کے مطابق امریکی خاتون کے مطابق وہ خود جب چاہےگی واپس اپنے وطن چلی جائےگی۔ امریکی خاتون کو فلاحی ادارے رکھنے کو تیار نہیں ہیں۔
پولیس ذرائع کا بتانا ہےکہ پاکستانی نوجوان ندال احمد کو 4 روز قبل حساس اداروں نے حراست میں لیا تھا جب کہ اس کے گھر والے گھر خالی کرکے جاچکے ہیں۔
اس سے قبل خبر آئی تھی کہ امریکی خاتون ائیرپورٹ سے ٹیکسی میں بیٹھ کر نامعلوم مقام پر چلی گئی ہے۔
ذرائع کا بتانا ہےکہ ائیرپورٹ حکام نے خاتون کو امریکی قونصل خانےکے حوالےکرنےکا فیصلہ کیا تھا مگر خاتون ائیرپورٹ سے ٹیکسی میں بیٹھ کر نامعلوم مقام پر چلی گئی اور پولیس کو کہا کہ اپنے شوہر کے پاس جا رہی ہوں۔
ائیرپورٹ ذرائع کا بتانا تھا کہ امریکی قونصل خانےکی 2 رکنی ٹیم نے کراچی ائیرپورٹ پہنچ کر امریکی خاتون سے ملاقات بھی کی اور ائیرپورٹ حکام سے بھی بات چیت کی۔
ذرائع کے مطابق امریکی حکام نے اس موقع پر کہا کہ کوشش یہی ہےخاتون کو راضی کرکے امریکا واپس بھیجاجائے لیکن اگر خاتون نہ جانا چاہےتو زبردستی نہیں کرسکتے۔
پولیس کا کہنا ہے کہ امریکی خاتون نے قونصلیٹ کی ٹیم سے مدد لینے سے انکار کردیا ہے اور وہ کسی کی مدد نہیں لینا چاہتی۔
ذرائع کے مطابق خاتون نے آج صبح امریکا واپسی کے لیے خلیجی ائیرلائن کی پرواز میں سوار ہونے سے انکارکردیا تھا۔ائیر پورٹ ذرائع کے مطابق محبت میں ناکامی پر مایوس خاتون نے کراچی ائیرپورٹ پر ہنگامہ آرائی بھی کی، امریکی خاتون نے پہلے امیگریشن کرانے سے انکار کیا اور پھر ڈیپارچر لاؤنج میں جہاز میں سوار نہیں ہوئی۔
ذرائع کا بتانا تھا کہ خاتون حیلے بہانے کرکےکراچی ائیرپورٹ پر امریکا واپسی سے کتراتی رہی، دلبر داشتہ خاتون نے پرواز کیو آر 611 سے براستہ دوحہ نیویارک جانا تھا۔
یاد رہے کہ اونیجا اینڈریو رابنس کراچی کے علاقے گارڈن کے رہائشی 19 سالہ ندال میمن سے محبت ہوئی تھی اور سوشل میڈیا پر محبت میں مبتلا دو بچوں کی ماں 11 اکتوبر کو کراچی پہنچی تھی۔
19 سالہ نوجوان ندال احمد میمن امریکی خاتون سے شادی کے لیے راضی تھا مگر گھر والوں نے امریکی خاتون سے شادی سے انکار کر دیا۔
امریکی خاتون کئی ماہ کراچی میں دربدر رہی اور پھر اس کا واپسی کا ٹکٹ ختم ہو گیا، وزٹ ویزے کی مدت ختم ہونے کے بعد اے ایس ایف نے امریکی خاتون کو ائیر پورٹ پولیس کے حوالے کر دیا تھا۔
ایک این جی او نے خاتون کی امریکا واپسی کے لیے ٹکٹ بھی دیا اور مالی مدد بھی کی تھی۔
امریکی خاتون کو سردی اور فلو کی وجہ سے ائیرپورٹ کے ایمرجنسی کلینک میں بھی داخل کیا گیا تھا۔
