01 فروری ، 2025 
نوجوان کی محبت میں کراچی آئی امریکی خاتون کو علاج کیلئے جناح اسپتال منتقل کردیا گیا
01 فروری ، 2025
پاکستانی نوجوان کی محبت میں کراچی آئی امریکی خاتون اونیجا کو کراچی کے جناح اسپتال منتقل کردیا گیا ہے جہاں اس کا علاج جاری ہے۔
امریکی خاتون اونیجا جناح اسپتال کے نفسیاتی وارڈ میں زیرعلاج ہے۔ اسپتال ذرائع کے مطابق امریکی خاتون کو گزشتہ شب جناح اسپتال میں لایا گیا تھا۔
اسپتال ذرائع کے مطابق اونیجا کو پولیس لےکر آئی تھی، اونیجا کے پیروں میں بہت سوجن ہے اور وہ عجیب باتیں کررہی ہے، اونیجا کے مختلف ٹیسٹ کیےجائیں گے۔
اس سے قبل امریکی خاتون کا امریکا میں موجود بیٹا بھی منظرعام پر آیا تھا جس نے اصل حقائق سے پردہ اٹھاتے ہوئے اپنی والدہ کو ذہنی مریض قرار دیا تھا۔
خاتون کے بیٹے نے اپنے ویڈیو پیغام میں کہا کہ میڈیا کے ذریعے معلوم ہوا والدہ پاکستان میں ہیں، میری والدہ ایک شخص اور اس کے اہلخانہ سے ملنے پاکستان گئی تھیں اور والدہ نے 2 ہفتے کے بعد واپس آنا تھا لیکن وہ نہیں آئیں۔
نوجوان نے مزید کہا کہ میں نے والدہ کو واپسی کے لیے منانے کی بھی بہت کوشش کی لیکن ناکام رہا، میرے بھائی اور میں نے ان کی واپسی کا ٹکٹ بھی کروایا تھا، والدہ ذہنی مریض ہیں ،ان کی سوچنے سمجھنے کی صلاحیت متاثر ہے۔
واضح رہے کہ مذکورہ خاتون 19 سالہ نوجوان سے شادی کی خواہش لیے گزشتہ برس 11 اکتوبر سے کراچی میں موجود ہیں اور امریکا واپس جانے سے انکار کر رہی ہیں۔
امریکی خاتون کا کہنا ہے کہ میری شادی آن لائن ہو چکی ہے، پیسوں کے لیے شادی نہیں کی، میرے پاس پیسے ہیں۔
