یوٹیوب میں آٹو ڈبنگ سمیت متعدد اے آئی فیچرز کا اضافہ

12 فروری ، 2025

یوٹیوب میں آٹو ڈبنگ سمیت متعدد اے آئی فیچرز کا اضافہ — یہ فیچرز آنے والے ہفتوں یا مہینوں میں دستیاب ہوں گے / فائل فوٹو

یوٹیوب میں رواں سال کے دوران آرٹی فیشل انٹیلی جنس (اے آئی) ٹیکنالوجی پر مبنی متعدد فیچرز متعارف کرائے جائیں گے۔

یوٹیوب کے چیف ایگزیکٹو نیل موہن نے اپنے سالانہ خط میں بتایا کہ 2025 میں اے آئی ٹیکنالوجی کمپنی کی 4 بڑی ترجیحات میں سے ایک ہے۔

انہوں نے بتایا کہ کمپنی کی جانب سے کریٹیرز کے لیے اے آئی ٹولز پر بھاری سرمایہ کاری کی جارہی ہے، جیسے صارفین کو ویڈیوز کے مواد کا آئیڈیا دینے، اچھے تھمب نیلز کے انتخاب میں مدد فراہم کرنے اور زبانوں کا ترجمہ کرنے والے جیسے اے آئی ٹولز متعارف کرائے جائیں گے۔

ٹرانسلیشن والا فیچر ان تمام صارفین کو دستیاب ہوگا جو یوٹیوب کے پارٹنر پروگرام کا حصہ ہیں اور اسے فروری میں ہی کسی وقت متعارف کرا دیا جائے گا۔

یہ بھی پڑھیں

کمپنی کے مطابق ایک اور اے آئی فیچر پر بھی کام کیا جا رہا ہے جو صارفین کی عمروں کی شناخت کرکے اس کے مطابق مناسب مواد کی سفارشات کرے گا۔

واضح رہے کہ گزشتہ مہینوں کے دوران یوٹیوب کی جانب سے متعدد اے آئی فیچرز متعارف کرائے گئے ہیں جیسے شارٹ ویڈیوز میں میوزک کا اضافہ، ویڈیو بیک گراؤنڈز اور دیگر۔

کمپنی کے مطابق مختلف اے آئی ٹولز کریٹیرز کو نئے ناظرین تک رسائی میں مدد فراہم کریں گے جن میں آٹو ڈبنگ قابل ذکر ہے، جس کے ذریعے صارفین اپنی ویڈیوز کا مختلف زبانوں میں ترجمہ کرسکتے ہیں۔

اپنے خط میں نیل موہن نے کہا کہ یہ فیچر فروری میں صارفین کو دستیاب ہوگا۔

اسی طرح کمپنی کی جانب سے ایسے ٹولز پر بھی کام کیا جا رہا ہے جو یہ دیکھنے اور کنٹرول کرنے کا کام کریں گے کہ یوٹیوب پر اے آئی کو کیسے استعمال کیا جا رہا ہے۔