12 فروری ، 2025 
مجھے کنگ شنگ کہنا بندکریں: بابر اعظم
12 فروری ، 2025
قومی کرکٹ ٹیم کے بلے باز بابر اعظم نے اپیل کی ہےکہ انہیں کنگ شنگ کہنا بند کریں۔
سہ ملکی سریز میں جنوبی افریقا کے خلاف قومی ٹیم کی کامیابی کے بعد گفتگو کرتے ہوئے بابراعظم کا کہنا تھا کہ جب بھی بیٹنگ کے لیے جاتا ہوں تو یہی سوچ کر جاتا ہوں کہ اچھا اسکور کرنا ہے، بدقسمتی سے فنش نہیں کر پارہا ہوں، آج رضوان اور سلمان نے اچھا کھیلا ہے، ایسی کارکردگی سے ٹیم میں اعتماد آتا ہے۔
بابر اعظم کا کہنا تھا کہ مجھے کنگ شنگ کہنا بندکریں، میں ابھی کوئی کنگ نہیں، جب چھوڑیں گے تب دیکھیں گے، میرے لیے اوپننگ ایک نیا رول ہے، ٹیم کی ڈیمانڈ پر یہ ذمہ داری ہے، جب اننگز بنتی ہے تو گیم چلانے کا اور پچ کا اندازہ ہوجاتا ہے، کوشش کرتا ہوں کہ اچھا کھیلوں مگر سیٹ ہونے کے بعد لمبی اننگز نہیں کھیل پا رہا۔
بابر اعظم کا کہنا تھا کہ میں خود سے بات کرتاہوں کہ کیسے اس صورتحال سے نکلنا ہے، میں نے جو پہلے کیا ہے وہ ماضی ہے، میں پچھلی پرفارمنس میں رہا تو آگے نہیں پرفارم کر پاؤں گا، جو پہلے کیا وہ دن گزر گیا، اگلے دن نیا پلان اور نیا مائند سیٹ ہوتا ہے، جب بڑا ٹوٹل عبور کرکے کامیاب ہوتے ہیں تو اس سے اعتماد ملتا ہے۔
