واٹس ایپ کا وہ بہترین نیا فیچر جسکی کمی سب محسوس کرتے ہیں

20 فروری ، 2025

واٹس ایپ کا وہ بہترین نیا فیچر جسکی کمی سب محسوس کرتے ہیں — ایک رپورٹ میں اس بارے میں بتایا گیا / فائل فوٹو

واٹس ایپ کا استعمال دنیا بھر میں 2 ارب سے زائد افراد کرتے ہیں اور اس پر اکثر صارفین کو میسجز کی بھرمار کا سامنا ہوتا ہے۔

درحقیقت بیشتر افراد کے لیے واٹس ایپ کے تمام پیغامات کو پڑھنا کافی مشکل ہوتا ہے جن میں سے زیادہ تر ان کے لیے غیرضروری ہوتے ہیں۔

اس سے قبل واٹس ایپ کی جانب سے ایک سیٹنگ کی آزمائش کی گئی تھی جس کے ذریعے آپ تمام ان ریڈ (unread) میسجز کو خودکار طور پر کلیئر کرسکتے تھے۔

پھر اس پر کام روک دیا گیا تھا مگر اب اس فیچر کی آزمائش دوبارہ شروع کی گئی ہے۔

یہ بھی پڑھیں

WABetaInfo کی ایک رپورٹ کے مطابق آئی او ایس ڈیوائسز کے لیے واٹس ایپ کے بیٹا (beta) ورژن میں یہ فیچر دیکھنے میں آیا ہے۔

رپورٹ میں بتایا گیا کہ آئی او ایس ڈیوائسز میں واٹس ایپ کی نوٹیفکیشن سیٹنگز میں کلیئر بیج کے نام سے ایک نئے آپشن کا اضافہ کیا گیا ہے۔

اس آپشن کے نیچے لکھا ہے کہ اسے ان ایبل کرنے پر جب بھی آپ ایپ کو اوپن کریں گے تو ہوم اسکرین بیج مکمل طور پر کلیئر ہو جائیں گے، آسان الفاظ میں ان ریڈ میسجز کلیئر ہوجائیں گے۔

اس فیچر کا مقصد ہوم اسکرین میں میسجز کی بھرمار سے پیدا ہونے والی الجھن کو ختم کرنا ہے تاکہ صارفین کو اس انزائٹی کا سامنا نہ ہو کہ انہیں درجنوں میسجز پڑھنے ہیں۔۔

رپورٹ کے مطابق اس فیچر کو ممکنہ طور پر آئندہ چند ہفتوں میں متعارف کرائے جانے کا امکان ہے۔

اس فیچر سے ان صارفین کو زیادہ فائدہ ہوگا جو متعدد واٹس ایپ گروپس کا حصہ ہیں اور ان کے لیے تمام میسجز کو پڑھنا ممکن نہیں ہوتا۔

اس طریقہ کار سے انہیں وقت بچانے کے ساتھ ساتھ واٹس ایپ ان باکس کو منظم رکھنے میں بھی مدد ملے گی۔