اوپن اے آئی کا اب تک کا سب سے طاقتور اے آئی ماڈل چیٹ جی پی 4.5 متعارف

28 فروری ، 2025

اوپن اے آئی کا اب تک کا سب سے طاقتور اے آئی ماڈل چیٹ جی پی 4.5 متعارف — کمپنی کی جانب سے اس کا اعلان کیا گیا / فوٹو بشکریہ اوپن اے آئی

اوپن اے آئی نے اپنا اب تک کا سب سے طاقتور آرٹی فیشل انٹیلی جنس (اے آئی) ماڈل جی پی ٹی 4.5 متعارف کرا دیا ہے۔

اس نئے ماڈل کو ہر طرح کے کاموں میں مدد فراہم کرنے کے لیے ڈیزائن کیا گیا ہے۔

یہ نیا اے آئی ماڈل چیٹ جی پی ٹی پر دستیاب ہے مگر اسے استعمال کرنے کے لیے پرو سبسکرائبر بننا ہوگا یا یوں کہہ لیں کہ ماہانہ 200 ڈالرز فیس ادا کرنا ہوگی۔

کمپنی کے مطابق یہ نیا ماڈل ابھی ریسرچ پریویو کے طور پر متعارف کرایا گیا ہے یعنی ابھی اس پر کام مکمل نہیں ہوا۔

یہ بھی پڑھیں

اوپن اے آئی کو توقع ہے کہ صارفین کی جانب سے نئے ماڈل میں موجود خامیوں یا بگ کو ڈھونڈنے میں مدد فراہم کی جائے گی۔

کمپنی کا دعویٰ ہے کہ ابتدائی صارفین نے جی پی ٹی 4.5 کو زیادہ بہتر اور جذباتی ذہانت سے لیس قرار دیا ہے۔

جی پی ٹی 4.5 کو کسی انکوائری کے تناظر کو سمجھنے کے لیے ماضی کے ماڈلز سے زیادہ بہتر قرار دیا گیا ہے جو سماجی اشاروں کو بھی شناخت کرسکے گا۔

درحقیقت کمپنی کے مطابق صارفین کو اس سے بات کرتے ہوئے محسوس ہوگا کہ وہ کسی حقیقی فرد سے بات کر رہے ہیں۔

اوپن اے آئی کے چیف ایگزیکٹو سام آلٹمین نے ایکس (ٹوئٹر) پوسٹ میں کہا کہ یہ پہلا اے آئی ماڈل ہے جسے استعمال کرتے ہوئے محسوس ہوتا ہے کہ ہم کسی پرفکر فرد سے بات کر رہے ہیں۔

انہوں نے مزید بتایا کہ بہت جلد جی پی ٹی 4.5 کو چیٹ جی پی ٹی پلس صارفین کے لیے بھی متعارف کرایا جائے گا۔

کمپنی نے اعتراف کیا کہ ابھی بھی اے آئی ماڈل خود سوچنے کی صلاحیت نہیں رکھتا مگر وہ اشاروں کو سمجھنے میں زیادہ بہتر ہوگا۔