10 مارچ ، 2025 
دہشتگرد مساجدکو نشانہ بنا رہے ہیں، یہ مجاہد نہیں قاتل اور مجرم ہیں: مولانا فضل الرحمان
10 مارچ ، 2025
جمعیت علماء اسلام (جے یو آئی) کے سربراہ مولانا فضل الرحمان نےکہا ہےکہ دہشت گرد مساجدکو نشانہ بنا رہے ہیں، یہ مجاہد نہیں قاتل اور مجرم ہیں۔
مولانا فضل الرحمان دارالعلوم حقانیہ اکوڑہ خٹک پہنچے اور مولانا حامد الحق کی شہادت پر تعزیت اور فاتحہ خوانی کی۔
اس موقع پر مولانا فضل الرحمان کا کہنا تھا کہ بندوق عالم دین کے خلاف کیسے استعمال ہو سکتی ہے؟ دہشت گرد مساجدکو نشانہ بنا رہے ہیں، یہ لوگ جہاد کا نام لےکر جنت کا راستہ دکھا رہے ہیں۔
مولانا فضل الرحمان کا کہنا تھا کہ ایک عالم دین کے خلاف بندوق اٹھانا تنگ نظری ہے جہاد نہیں، مولانا حسن جان کو بھی شہیدکیا گیا، اپنے استادکے قاتل کو مجاہدکیسے کہیں؟ دل سے بددعائیں نکلتی ہیں، یہ مجاہد نہیں قاتل اور مجرم ہیں، یہ کالی آندھیاں گزر جائیں گی، یہ مدارس یہ عالم دین رہیں گے۔
ان کا کہنا تھا کہ مولاناسمیع الحق کی شہادت کا غم ابھی تازہ ہی تھا کہ ان کے بیٹےکو بھی شہیدکردیا گیا، انسان اور عالم دین کے خلاف کارروائیاں جہاد نہیں دہشت گردی ہے، پہلے ہم کہتے تھےکہ اللہ ان کو ہدایت دے اب دل سے ان کے لیے بد دعا نکلتی ہے۔
انہوں نےکہا کہ یہ حملہ حامد الحق پر نہیں میرےگھر اور مدرسے پر ہوا ہے، جدائی قابل برداشت نہیں ہوتی، سوائےصبر کے اورکوئی چارہ نہیں۔
مزید خبریں :
یونان کشتی حادثےکا مرکزی ملزم عثمان ججہ گرفتار ہوگیا
9 گھنٹے پہلے
حکومت کا 15مارچ کو یوم تحفظ ناموس رسالت ﷺ منانےکا فیصلہ
10 گھنٹے پہلے
