واٹس ایپ میں ایک بہترین فیچر خاموشی سے متعارف

06 اپریل ، 2025

واٹس ایپ میں ایک بہترین فیچر خاموشی سے متعارف — کمپنی نے اس فیچر کا اعلان نہیں کیا / فائل فوٹو

میٹا کی جانب سے واٹس ایپ میں مسلسل نئے فیچرز کا اضافہ کیا جاتا ہے تاکہ اس میسجنگ پلیٹ فارم کے استعمال کا تجربہ بہتر ہوسکے۔

اب اس کمپنی کی جانب سے گروپ چیٹس کے لیے ایک کارآمد فیچر خاموشی سے متعارف کرایا گیا ہے۔

اس فیچر سے صارفین کو یہ جاننے میں مدد ملے گی کہ کسی گروپ چیٹ میں کتنے افراد ابھی آن لائن ہیں۔

ابھی واٹس ایپ میں کسی گروپ چیٹ کو اوپن کیا جائے تو اس پر اوپر مختلف تفصیلات موجود ہوتی ہیں جیسے کون ٹائپنگ کر رہا ہے۔

یہ بھی پڑھیں

مگر اس نئی اپ ڈیٹ کے بعد ایکٹیویٹی سمری کے ساتھ آن لائن کاؤنٹر کو بھی گروپ چیٹ ونڈو کا حصہ بنا دیا گیا ہے۔

اس آن لائن کاؤنٹر سے صارف کو معلوم ہوگا کہ اس کے ساتھ ساتھ کتنے افراد گروپ چیٹ میں آن لائن ہیں۔

اس تبدیلی کا مقصد گروپ چیٹس کو زیادہ کارآمد بنانا ہے جبکہ صارفین کو یہ جاننے میں بھی مدد ملے گی کہ کسی گروپ چیٹ میں رابطے کے لیے کونسا وقت بہترین ہوسکتا ہے۔

یہ واضح رہے کہ اس آن لائن کاؤنٹر میں بس یہ ظاہر ہوگا کہ کون واٹس ایپ پر آن لائن ہے، اس سے یہ عندیہ نہیں ملے گا کہ کون کون آن لائن ہے یا وہ فرد چیٹس پر بات کر بھی رہا ہے یا نہیں۔

یہ فیچر بس یہ بتاتا ہے کہ کون کون کسی گروپ چیٹ پر آن لائن ہے اور اس کے پاس واٹس ایپ اوپن ہے۔

رپورٹ میں مزید بتایا گیا کہ اس فیچر میں صارفین کی پرائیویسی سیٹنگز کا خیال رکھا گیا ہے۔

اگر کسی فرد نے اپنے آن لائن اسٹیٹس کو ہائیڈ کیا ہوا ہے تو وہ اس آن لائن کاؤنٹر پر شو نہیں ہوگا۔

یہ فیچر واٹس ایپ کے ایکٹیو گروپس میں زیادہ مددگار ثابت ہوگا۔