09 اپریل ، 2025 
سندھ حکومت کا اسٹیل ملز کے اسپتال، اسکول اورکالج کا انتظام سنبھالنےکا اعلان
09 اپریل ، 2025
کراچی: سندھ حکومت نے اسٹیل ملز سے منسلک اسپتال ، اسکول اور کالج کا انتظام سنبھالنے کا اعلان کردیا۔
وزیر اعلیٰ ہاؤس میں منعقد اجلاس میں صوبائی وزراء ،کنوینر پاکستان اسٹیل گرینڈ الائنس اور پاکستان اسٹیل آل ایمپلائز گرینڈ الائنس کے اراکین اور دیگر حکام شریک ہوئے۔
وزیراعلیٰ مراد علی شاہ نے پاکستان اسٹیل ملز کی بحالی اور اس کے ملازمین کی فلاح و بہبود کے لیے سندھ حکومت کے عزم کا اعادہ کیا۔
ان کا کہنا تھا کہ وہ چاہتے ہیں اسٹیل ملز کے ملازمین کے مسائل حل ہوں، اسٹیل ملز کی بحالی کے لیے 700 ایکڑ اراضی مختص کی گئی ہے اور اسٹیل ملز کی انتظامیہ اور متعلقہ وزارت ایک نئے اسٹیل پلانٹ کے لیے فزیبلٹی اسٹڈی پر کام کر رہی ہے۔
انہوں نے وفاقی حکومت کی جانب سے اسٹیل ملز بند کرنے کے فیصلے پر تشویش کا اظہار کرتے ہوئےکہا کہ ملازمین کو برطرف کرنا بحالی کے مقصد کے خلاف ہے، وزیراعظم سے درخواست کریں گے کہ رمضان سے قبل برطرف کیےگئے 1,370 ملازمین کو بھی بحال کیا جائے۔
وزیراعلیٰ نے اسٹیل ٹاؤن میں پانی کی فراہمی فوری طور پر بحال کرنے کی ہدایت دی اور اعلان کیا کہ اسٹیل ٹاؤن کے 100 بستروں پر مشتمل اسپتال، اسکول اور کالج دوبارہ کھولے جائیں گے اور ان کا انتظام سندھ حکومت سنبھالے گی جب کہ بجلی کے مسائل بھِی ترجیحی بنیادوں پر حل کیے جائیں گے۔
