24 اپریل ، 2025 
بھارتی ناظم الامورکی دفتر خارجہ طلبی، پاکستان نے جوابی فیصلوں سے تحریری آگاہ کردیا
24 اپریل ، 2025
اسلام آباد: دفتر خارجہ نے بھارتی ہائی کمیشن کے ناظم الامور گیتکا سری واستو کو طلب کرکے بھارتی اقدامات پر شدید احتجاج کیا اور ہائی کمیشن میں موجود ناپسندیدہ شخصیات کی فہرست تھمادی۔
ذرائع کے مطابق پاکستان کی جانب سے بھارتی ہائی کمیشن میں بھارتی بری، بحری اور فضائی اتاشیوں کو ناپسندیدہ قرار دیا گیا ہے۔ بھارت کے بری، بحری اور فضائی اتاشیوں کو فوری طور پر ملک چھوڑنے کا حکم دیا گیا ہے۔
ذرائع کے مطابق بھارت کے فوجی اتاشیوں کے ساتھ ان کے عملے کو بھی ملک چھوڑنےکا حکم دیا گیا ہے۔ پاکستان نے بھارت کو اپنے جوابی فیصلوں سے تحریری آگاہ کردیا۔ بھارتی ناظم الامور کو سفارتی تعلقات نچلی سطح پر لانےکےفیصلوں سے بھی آگاہ کیا گیا۔
سفارتی ذرائع کا کہنا ہے کہ بھارتی ہائی کمیشن کے عملےکو 30 افراد تک محدود کرنے کے فیصلے سے بھی آگاہ کیا گیا۔ تمام بھارتی شہریوں کو 48 گھنٹوں میں پاکستان چھوڑنے کے فیصلے سے آگاہ کیا گیا۔ بھارتی ناظم الامور کو واہگہ بارڈر بند کرنے کے فیصلے سے بھی آگاہ کیا گیا۔ بھارت کو تمام بھارتی کمرشل پروازوں کے لیے فضائی حدود بندکرنےکے فیصلے سے آگاہ کیا گیا۔
ذرائع کے مطابق پاکستان کی جانب سے سندھ طاس معاہدے کی معطلی کو یکطرفہ قرار دیا گیا۔ بھارت کو شملہ و دیگر پاک بھارت معاہدے معطل کرنے کے امکانات سے بھی آگاہ کیا گیا۔ پاک بھارت تجارت بشمول بالواسطہ تجارت کی معطلی کے فیصلے سے بھی آگاہ کیا گیا۔
