چیزیں برداشت سے باہر ہوچکیں، فون کرکے والدین سے میری موت کا پوچھا جا رہا ہے: علیزے شاہ پھٹ پڑیں

پاکستانی اداکارہ علیزے شاہ نے انکشاف کیا ہے کہ ان کی جانب سے انسٹاگرام کو کچھ عرصے کے لیے خیرباد کہنے کے بعد نیوز چینلز ان کے والدین کو فون کرکے ان کی موت سے متعلق پوچھا جو کافی تکلیف دہ تھا۔

کچھ روز قبل اداکارہ نے انسٹاگرام سے کنارہ کرنے کا فیصلہ کیا تھا اور ساتھ ہی ایک اسٹوری بھی شیئر کی تھی جس میں انہوں نے سوشل میڈیا کو جہنم سے بھی زیادہ بری جگہ قرار دیا۔

اس کے علاوہ ان کے انسٹاگرام پر درج بائیو بھی توجہ کا مرکز بن گیا  تھا جس میں اداکارہ نے لکھا 'ناٹ ڈیڈ'۔

اب علیزے شاہ نے انسٹاگرام اسٹوری میں میڈیا، سوشل میڈیا اور صارفین کے رویے پر  دکھ اور مایوسی کا اظہار کرتے ہوئے درخواست کی کہ انہیں سانس لینے اور زندہ رہنے دیا جائے۔

اپنی پوسٹ میں انہوں نے لکھا کہ ٹرولنگ، سخت تنقید اور  منفی تبصرے اور باتوں سے وہ نا صرف شدید ذہنی اضطراب میں مبتلا ہوچکی ہیں بلکہ اب انہیں جسمانی طور پر بھی تکلیف ہونے لگی ہے۔

علیزے شاہ نے لکھا کہ اب ان کے پاس مکمل طور پر سوشل میڈیا اور میڈیا سے دور رہنے کے علاوہ کوئی راستہ نہیں بچا، وہ خود کو محفوظ کرنے کے لیے ہر کسی سے دور ہوں گی۔

اداکارہ نے لکھا کہ کچھ دن قبل جب انہوں نے انسٹاگرام سے تمام پوسٹس ڈیلیٹ کردی تھیں، تب انہوں نے واضح طور پر بائیو میں لکھا تھا کہ وہ زندہ ہیں لیکن اس کے باوجود کچھ لوگوں نے ان سے متعلق جھوٹی افواہیں پھیلائیں اور یہاں تک کہ نیوز چینل ان کے والدین سے رابطہ کرکے یہ پوچھتے رہے کہ کیا علیزے شاہ مر چکی ہیں؟

علیزے شاہ نے انسٹاگرام سے تمام پوسٹس ڈیلیٹ کردیں، آخری اسٹوری میں کیا کہا؟

علیزے شاہ کے سوشل میڈیا سے دوری اختیار کرنے کے بعد ان کے انسٹاگرام اکاؤنٹ پر کوئی پوسٹ موجود نہیں جب کہ اداکارہ نے سب کو ان فالو بھی کردیا

انہوں نے لکھا کہ کوئی اس تکلیف کا تصور نہیں کر سکتا کہ کسی کے خاندان سے ان کی موت سے متعلق پوچھا جا رہا ہے؟ اور میری ماں کے دل پر کیا گزر رہی ہوگی؟

علیزے نے میڈیا اور سوشل میڈیا سے اپیل کی کہ ان کے خلاف مہم جوئی بند کی جائے۔ انہیں معلوم نہیں کہ وہ اب کب تک سوشل میڈیا اور میڈیا میں واپسی کریں گی، انہیں ڈراموں میں واپسی سے متعلق بھی کچھ علم نہیں۔

انہوں نے لکھا کہ اب چیزیں ان کی برداشت سے باہر ہوچکی ہیں اور وہ سوشل میڈیا اور میڈیا کے رویے سے تھک چکی ہیں۔