کیا آپ بھی واٹس ایپ سے مختصر بریک چاہتے ہیں؟ دلچسپ فیچر پر کام جاری

31 مئی ، 2025

کیا آپ بھی واٹس ایپ سے مختصر بریک چاہتے ہیں؟ دلچسپ فیچر پر کام جاری — حال ہی میں اینڈرائیڈ کے لیے واٹس ایپ کے تازہ ترین بیٹا ورژن پر اکاؤنٹ سیٹنگ میں لاگ آؤٹ آپشن دیکھا گیا ہے/ فائل فوٹو

واٹس ایپ اپنے صارفین کی سہولت کیلئے آئے روز نئے فیچرز پر کام کررہا ہے اور یہ فیچرز واٹس ایپ کے بیٹا ورژن میں ریلیز ہونے سے بھی قبل دیکھےجاتے ہیں۔

حال ہی میں اینڈرائیڈ کے لیے واٹس ایپ کے تازہ ترین بیٹا ورژن پر اکاؤنٹ سیٹنگ میں لاگ آؤٹ آپشن دیکھا گیا ہے۔

اس آپشن کی دستیابی کے بعد جب سیٹنگ میں لاگ آؤٹ پر فیچر پر کلک کیا جائیگا تو صارف کو 2 آپشن فراہم کیے جائیں گے۔

ان میں سے ایک آپشن پر کلک کرکے لاگ آؤٹ کے ساتھ ساتھ صارف اپنا تمام ڈیٹا اور ترجیحات بھی ضائع کردے گا جب کہ دوسرا آپشن صارف کے تمام تر ڈیٹا اور ترجیحات کو برقرار رکھنے کا ہے۔

اگر آپ اس فیچر کے تحت اپنے ڈیٹا اور ترجیحات کو ضائع کرنے کا انتخاب کرتے ہیں تو یہ آپشن بنیادی طور پر واٹس ایپ ان انسٹال کرنے جیسا ہے جو آپ کے واٹس ایپ کو لاگ آؤٹ کرنے کے ساتھ ساتھ آپ کی ایپ کے تمام ڈیٹا اور ترجیحات کو حذف کر دیتا ہے لیکن اس صورت میں آپ کو گروپس سے نہیں نکالا جائے گا ۔

دوسری طرف وہ آپشن ہے جو لاگ آؤٹ کرنے کے باوجود آپ کے ڈیٹا کو حذف نہیں کرے گابلکہ آپ کی تمام چیٹس، گروپ چیٹس، ڈیٹا، حتیٰ کہ ترجیحات بھی آپ کے واپس آنے کی منتظر ہوں گی۔

اس آپشن کے ذریعے لاگ آؤٹ ہوجانے کے باوجود آپ اپنے فون نمبر کے ذریعے دوبارہ سائن ان کرکے آسانی سے ہر چیز کو بحال کر سکتے ہیں۔

ٹیکنالوجی رپورٹس کے مطابق یہ فیچر ان لوگوں کے لیے تیار کیا گیا ہے جو کسی بھی وجہ سے واٹس ایپ سے مختصر وقفہ لینا چاہتے ہیں۔