واشنگٹن …ایم کیوایم کے قائد الطاف حسین کے خلاف بے بنیاد اور جھوٹے الزامات اور ایم کیوایم کے کارکنان کے بہیمانہ قتل اورپاکستان بالخصوص کراچی میں دہشت گردی کی بڑھتی ہوئی کارروائی کے خلاف ایم کیوایم امریکہ کے زیر اہتمام گزشتہ روز نیو یارک میں اقوام متحدہ کے سامنے ایک بڑا احتجاجی مظاہرہ ہوا جس میں امریکہ کے 16سے زائد شہروں سے ایم کیوایم کے کارکنان اور ہمدردوں نے بڑی تعداد میں شرکت کی ۔ احتجاجی مظاہرے میں ایم کیوایم نارتھ امریکہ کے نگراں عباد الرحمن ، جوائنٹ آرگنائزر محمد ارشد حسین اور سینٹرل آرگنائزنگ کمیٹی کے علاوہ چیپٹر انچارجز بھی موجود تھے ۔ احتجاجی مظاہرے کے شرکاء نے اپنے ہاتھوں میں پلے کارڈز اور بینرز اٹھا رکھے تھے جن پر دہشت گرد ی کے خلاف نعرے درج تھے ۔ مظاہرے کے شرکاء میں کارکنان کے بہیمانہ قتل اور بعض سیاسی رہنماوٴں کے خلاف پر مبنی وائٹ پیپر بھی تقسیم کیا گیا ۔ احتجاجی مظاہرے کے شرکاء سے خطاب کرتے ہوئے امریکہ کے نگراں عبا د الرحمن نے کہا کہ نئے پاکستان کی باتیں کرنے والے سیاسی رہنماوٴں نے طالبان اوردیگرانتہاپسند دہشت گردوں کی حمایت کی ہے اور اپر دیر اور لوئر دیر سمیت خیبر پختونخوا کے کئی علاقوں میں خواتین کو ووٹ ڈالنے پرپابندی جیسے معاہدوں نے اس بات کو ثابت کردیا ہے کہ نئے پاکستان کی باتیں کرنے والے دراصل پاکستان کوتاریکی کے دورمیں لیجاناچاہتے ہیں ، الطاف حسین پاکستان کے واحد لیڈر ہیں جو پاکستان کو دہشت گردوں کے ہاتھوں میں جانے سے روکنے کی جدوجہد کررہے ہیں،ان نازک حالات میں ایک انتہاپسند جماعت کے سربراہ نے الطاف حسین پر جھوٹے الزامات لگا کر ثابت کردیا ہے کہ وہ نئے پاکستان کے لیڈر نہیں بلکہ دہشت گردوں کے ایجنٹ ہیں ، ایم کیوایم دہشت گردوں کے ایجنڈے کے آگے سرنڈر نہیں کرے گی اور اپنے آئینی و قانونی حق کا ہر سطح پر استعمال کرے گی ۔ مظاہرے سے جوائنٹ آرگنائزر محمد ارشد حسین نے بھی خطاب کیا۔