اسلام آباد… پیپلز پارٹی کے رہنما بابراعوان کے خلاف توہین عدالت کیس کی سماعت آج سپریم کورٹ میں ہوگی ، ان پرفرد جرم عائد کئے جانے کا امکان ہے۔ سپریم کورٹ نے میموگیٹ کیس کی سماعت پر بابراعوان کو دیگر حکومتی شخصیات کے ہمراہ عدلیہ کے خلاف ہتک آمیز نیوزکانفرنس کرنے پر توہین عدالت کا نوٹس جاری کیا تھا۔ سپریم کورٹ میں گزشتہ ہونیوالی سماعت جسٹس انور ظہیر جمالی کی سربراہی میں جسٹس اعجازافضل اور جسٹس اطہر سعید پر مشتمل بنچ نے کی۔ عدالت کو بتایاگیا تھا کہ اٹارنی جنرل دیگر مقدمات میں مصروف ہیں جس پر علی ظفر ایڈووکیٹ نے کہاکہ قانون کا تقاضا ہے کہ اٹارنی جنرل ، فرد جرم عائد ہونے کی کارروائی میں موجود ہوں۔ جسٹس انور ظہیر نے ریمارکس دیئے کہ فرد جرم عدالت نے عائد کرنا ہے، اس پر علی ظفر نے کہاکہ ایسا تاثر نہیں ملنا چاہیئے کہ عدالت استغاثہ ہے۔ بعد میں بابر اعوان کے وکیل بیرسٹر علی ظفر نے میڈیا سے گفت گو میں کہا کہ قانون میں غیر مشروط معافی مانگنے کی گنجائش ہے مگر اس بات کا فیصلہ ا ن کے موکل نے کرناہے۔