لندن....... پنجاب کے وزیراعلیٰ اور مسلم لیگ ن کے مرکزی رہنما شہبازشریف نے پیرکی شام ایم کیوایم کے قائد الطاف حسین سے فون پررابطہ کیااوران سے موجودہ سیاسی صورتحال پر گفتگوکی۔دونوں رہنماؤ ں کے درمیان نہایت خوشگوارماحول میںگفتگو ہوئی،اور ایک دوسرے کی خیریت دریافت کی۔شہبازشریف نے الطاف حسین کو وزیراعظم نواز شریف کا سلام اور خیرسگالی کاپیغام پہنچایا۔ الطاف حسین نے بھی وزیراعظم کی خیریت دریافت کی اور ان کیلئے نیک جذبات کااظہار کیا۔ دوران گفتگوموجودہ سیاسی صورتحال پربھی تبادلہ خیال کیاگیا،اوردونوں جماعتوںکے درمیان بہتر تعلقات کے قیام اور سینیٹ کے چیئرمین اور ڈپٹی چیئرمین کے الیکشن میں تعاون پر بھی بات چیت کی گئی۔ الطاف حسین نے اس موقع پر گفتگوکرتے ہوئے کہاکہ سیاسی و نظریاتی اختلاف جمہوری عمل کاحصہ ہیں لیکن ہمیں سیاسی اختلاف کو قبائلی طرزپر نسل درنسل دشمنی کی شکل نہیں دیناچاہیے اورماضی کی تلخیوں کوبالائے طاق رکھ کر ایک دوسرے کے احترام کی فضاء کوقائم رکھنا چاہئے اورسیاسی ونظریاتی اختلاف کے باوجودایک دوسرے کے مینڈیٹ کوخوشدلی سے تسلیم کرناچاہیے ۔ شہبازشریف نے الطاف حسین کی بات سے مکمل اتفاق کرتے ہوئے کہا کہ ہم ماضی کی باتوںکوقصہء پارینہ بناناچاہتے ہیں اورایک دوسرے کے وجودکوتسلیم کرتے ہوئے بہتراورخوشگوارتعلقات قائم کرنا چاہتے ہیں،شہبازشریف نے لندن آکرالطاف حسین سے ملاقات کی خواہش کابھی اظہارکیا۔دونوں رہنماؤںکے درمیان پاکستان کودہشت گردی کی لعنت سے نجات دلانے کیلئے مسلح افواج کی جانب سے جاری آپریشن ضرب عضب پربھی تبادلہ خیال کیاگیااورضرب عضب کی کامیابی کیلئے دعاکی گئی ۔ وزیراعلیٰ پنجاب نے دہشت گردی کے خاتمہ کیلئے مسلح افواج کے ساتھ مشترکہ طورپرکی جانے والی کوششوں سے بھی الطاف حسین کوآگاہ کیا۔الطاف حسین نے کہاکہ پاکستان کی مسلح افواج اورپاکستانی عوام نے دہشت گردی کے خلاف جاری جنگ میں بھاری قربانیاں دی ہیں اور مسلح افواج سمیت پوری قوم کا یہی عزم ہے کہ ملک کودہشت گردی سے نجات دلانے کیلئے آخری دہشت گرد کے خاتمہ تک آپریشن ضرب عضب کا جاری رہناضروری ہے ۔ انہوں نے کہاکہ پوری قوم کودہشت گردی کے خاتمہ کیلئے مسلح افواج کے شانہ بشانہ ساتھ دینا چاہیے ۔ دونوں رہنماؤں میں ایک دوسر ے کے ساتھ ملاقاتوں اور رابطوں کاسلسلہ جاری رکھنے پر بھی اتفاق کیاگیا۔