واشنگٹن.........فرانس کے صدر فرانسکو اولاندے سے وائٹ ہاؤس میں ملاقات کے بعد امریکی صدر براک اوباما نے کہاہے کہ امریکا شام میں داعش کے دہشت گردوں سے لڑنے کے لیے روس کی حمایت کرسکتا ہے ۔

تاہم مذکورہ آپریشن میں امریکی حمایت حاصل کرنے کے لیے ماسکو کو اپنی توجہ شامی حکومت کو اقتدار میں رہنے کے لیے مدد دینے کے بجائے صرف داعش کو ختم کرنے پر مرکوز کرنا ہوگی۔میڈیا رپورٹ کے مطابق اوباما نے کہاکہ پیرس حملوں کے تناظر میں امریکا اور فرانس متحد ہیں۔

انہوں نے اعتراف کیا کہ رواں ماہ پیرس میں ہونے والے حملوں کے بعد یہ خدشہ ظاہر کیا جارہا تھا کہ ایسے حملے امریکا میں بھی ہوسکتے ہیں ٗانھوں نے اس موقع پر امریکی شہریوں کی حفاظت کے عزم کا بھی اعادہ کیا۔

امریکی صدر نے کہاکہ پیرس میں جو کچھ ہوا وہ انتہائی خوف ناک ہے اور میں اس بات کو سمجھ سکتا ہوں کہ کچھ لوگ اس بات سے پریشان ہیں کہ اس جیسا واقعہ یہاں بھی ہوسکتا ہے۔صدر اوباما نے کہا کہ دہشت گردوں کے خلاف فرانس کی جنگ میں چاہے کچھ بھی ہوجائے ٗبرے اور اچھے وقتوں میں ہم اپنے دوستوں کے ساتھ ہیں۔

انھوں نے اعلان کیا کہ داعش ہم سب کیلئے بڑا خطرہ ہے اوراسے کسی بھی صورت برداشت نہیں کیا جائے گا اسے ہر صورت میں ختم ہونا ہے اور ہم سب مل کر یہ کریں گے۔