08 دسمبر ، 2017 
مشرق وسطیٰ میں امن کیلیے پرعزم ہیں، امریکی سفیر برائے اقوام متحدہ
08 دسمبر ، 2017
امریکی سفیر برائے اقوام متحدہ نکی ہیلے نے کہا ہے کہ صدر ڈونلڈ ٹرمپ مشرق وسطیٰ میں امن کے لیے پرعزم ہیں۔
امریکی صدر ڈونلڈ ٹرمپ کی جانب سے یروشلم کو اسرائیل کا دارالحکومت تسلیم کیے جانے پر دنیا بھر کے ممالک کی جانب سے سخت ردعمل سامنے آ رہا ہے۔
امریکی صدر کے فیصلے کے بعد ردعمل دیتے ہوئے فرانس کے صدر ایمینوئیل میکرون کی درخواست پر سلامتی کونسل کا ہنگامی اجلاس طلب کیا گیا۔
سلامتی کونسل کے ہنگامی اجلاس سے خطاب کرتے ہوئے امریکی سفیر نکی ہیلے کا کہنا تھا کہ میں دوبارہ یقین دہانی کراتی ہوں کہ صدر ڈونلڈ ٹرمپ اور امریکی انتظامیہ مشرق وسطیٰ میں امن کے لیے پرعزم ہے۔
نکی ہیلے کا کہنا تھا کہ امریکی صدر ڈونلڈ ٹرمپ نے گزشتہ دو دہائیوں سے التوا کا شکار خارجہ پالیسی کی توٖثیق کی اور اسرائیلی حکومت اور پارلیمنٹ بھی یروشلم میں ہی واقع ہے۔
امریکی سفیر نے مزید کہا کہ ڈونلڈ ٹرمپ نے اسرائیل اور فلسطین کی انتظامی حدود سے متعلق کوئی فیصلہ نہیں دیا اور نا ہی اس فیصلے سے مقدس شہر کی حیثیت پر کوئی اثر پڑے گا۔
خیال رہے کہ مقبوضہ بیت المقدس مشرقی حصے میں مسجد اقصیٰ یعنی مسلمانوں کا قبلہ اول واقع ہے جسے اسلامی تاریخ میں اہم درجہ حاصل ہے۔
نکی ہیلے نے کہا کہ میں سلامتی کونسل کا اجلاس طلب کرنے والے ممبر ممالک کے تحفظات کو سمجھتی ہوں اور یہ کہ تبدیلی بہت مشکل ہے۔
مزید خبریں :
یواے ای میں اسرائیلی مذہبی رہنما کے قتل کے شبے میں 3 افرادگرفتار
25 نومبر ، 2024
دبئی میں لاپتہ اسرائیلی مذہبی رہنما کی لاش مل گئی
24 نومبر ، 2024
اسرائیل نے لبنانی فوج کے اڈے کو نشانہ بنانے پر معافی مانگ لی
24 نومبر ، 2024
