زینب کیس: پنجاب حکومت اور پولیس سنجیدہ نہیں، لاہور ہائیکورٹ

لاہور: چیف جسٹس لاہور ہائیکورٹ کا کہنا ہےکہ زینب قتل کیس میں پنجاب حکومت اور پولیس سنجیدگی کا مظاہرہ نہیں کررہی ہے۔

پنجاب کے ضلع قصور سے اغوا کی جانے والی 7 سالہ بچی زینب کو زیادتی کے بعد قتل کردیا گیا جس کی لاش 9 جنوری کو کچرا کنڈی سے ملی۔

زینب کے قتل سے ملک بھر میں غم و غصے کی لہر دوڑ گئی اور قصور میں پرتشدد مظاہرے پھوٹ پڑے جس سے 2 افراد پولیس فائرنگ سے جاں بحق ہوگئے۔

قصور واقعہ: ’چند مشکوک افراد کو پکڑ لیا گیا‘

قوی امید ہے کہ واقعے میں ملوث ملزم جلد پکڑا جائے گا، وزیر تعلیم پنجاب رانا مشہود

چیف جسٹس پاکستان اور چیف جسٹس لاہور ہائیکورٹ نے واقعے کا از خود نوٹس لیا تھا جب کہ چیف جسٹس لاہور ہائیکورٹ نے گزشتہ سماعت پر آئی جی پنجاب کو 36 گھنٹوں میں ملزم گرفتار کرکے رپورٹ دینے کا حکم دیا تھا لیکن ملزم گرفتار نہ ہوسکے۔

کیس کی سماعت

آج لاہور ہائیکورٹ کے چیف جسٹس منصورعلی شاہ نے زینب قتل کے از خود نوٹس کیس کی سماعت کی تو اس دوران طلب کیے جانے کے باوجود آئی جی پنجاب عدالت میں پیش نہیں ہوئے جس پر چیف جسٹس نے سخت نوٹس لیا۔

چیف جسٹس لاہور ہائیکورٹ نے ریمارکس دیئے کہ طلب کیے جانے کے باوجود آئی جی پنجاب کے پیش نہ ہونے سے لگتا ہے کہ  پنجاب حکومت اور پولیس اس کیس میں سجیدہ نہیں ہے۔

زینب قتل واقعے پر قوم کا سر شرم سے جھک گیا، چیف جسٹس پاکستان

اس واقعے پر مجھ سے زیادہ میری اہلیہ گھر میں پریشان تھیں، جسٹس میاں ثاقب نثار

دوران سماعت پنجاب پولیس کے ایڈیشنل آئی جی اور زینب قتل کیس کی تحقیقات کے لیے بننے والی جے آئی ٹی کے سابق سربراہ ابوبکر خدا بخش عدالت میں پیش ہوئے۔

ایڈیشنل آئی جی نے عدالت کو بتایا کہ زینب کیس میں 67 لوگوں کے ڈی این اے ہوئے۔

ملزم سیریل کلر لگتا ہے، ڈی جی فارنزک

ڈی جی فارنزک پنجاب نے عدالت کو آگاہ کیا کہ ان تمام معلومات سے لگتا ہے کہ اس کیس میں سیریل کلر ملوث ہیں کیونکہ اس سے قبل ایک بچی کائنات بھی اس درندگی کا نشانہ بنی جو اس وقت چلڈرن اسپتال میں زیر علاج ہے۔

چیف جسٹس نے حکم دیا کہ بچی کائنات کی طبی امداد کے حوالے سے تمام تر اقدامات کیے جائیں۔

آئی جی پنجاب کو پیش ہونے کا حکم

چیف جسٹس لاہور ہائیکورٹ نے حکم دیا کہ آئی جی پنجاب آئندہ سماعت پر پیش ہوں اور زینب کے واقعے سے متعلق تفصیلات اور ملزمان کی گرفتاری کے لیے کی جانے والی کوششوں کی تمام معلومات بھی آئندہ سماعت پر پیش کی جائیں۔

جسٹس منصور علی شاہ نے کہا کہ بچوں کے جرائم سے متعلق خصوصی عدالت قائم کردی ہے جو اس طرح کے جرائم کی سماعت کرے گی۔

چیف جسٹس نے صوبے بھر کی ماتحت عدالتوں کو بھی حکم دیا کہ بچوں سے متعلق جرائم کے مقدمات کی روزانہ کی بنیاد پر سماعت کی جائے اور ان پر خصوصی توجہ دی جائے۔

بعد ازاں عدالت نے کیس کی سماعت 17 جنوری تک ملتوی کردی۔

زینب قتل: مشتبہ شخص کے قریب پہنچ گئے ہیں، ترجمان پنجاب حکومت

زینب کا قاتل کوئی سیریل کلر ہے، 24 گھنٹے میں ہونے والی تحقیقات سے متعلق عوام کو آگاہ کریں گے، ملک احمد خان

قصور: کمسن زینب سے زیادتی و قتل کی لرزہ خیز واردات، پرتشدد احتجاج میں 2 افراد جاں بحق

واقعے کی تحقیقات کے لیے جے آئی ٹی تشکیل دیدی گئی، چیف جسٹس اور آرمی چیف کا نوٹس، ڈی پی او قصور کو عہدے سے ہٹادیا گیا۔