پاکستان

فیض آباد دھرنا: خادم رضوی کے ناقابل ضمانت وارنٹ گرفتاری جاری

20 مارچ ، 2018

اے ٹی سی نے تین مقدمات میں خادم رضوی کے وارنٹ جاری کیے: فوٹو/ فائل

اسلام آباد: انسداد دہشت گردی کی عدالت نے فیض آباد دھرنا کیس سے متعلق دیگر 3 مقدمات میں خادم حسین رضوی سمیت تین ملزمان کے ناقابل ضمانت وارنٹ گرفتاری جاری کردیئے۔

گزشتہ سال نومبر میں اسلام آباد کے علاقے فیض آباد پر تحریک لبیک کی جانب سے دھرنا دیا گیا جو تقریباً 22 روز بعد ختم ہوا جب کہ اس دوران توڑ پھوڑ اور پولیس اہلکاروں پر حملے کے مقدمات بھی درج کیے گئے۔

اسلام آباد کی انسداد دہشت گردی کی عدالت نے بار بار طلبی کے باوجود پیش نہ ہونے پر گزشتہ روز پولیس خادم رضوی اور پیر افضل قادری کی گرفتاری کا حکم دیا تھا۔

کیس کی سماعت

جیونیوز کے مطابق انسداد دہشت گردی کی عدالت کے جج شاہ رخ ارجمند نے فیض آباد دھرنے کے دوران پولیس چوکی پر حملے اور تشدد کے مقدمات کی سماعت کی جس میں تحریک لبیک کے خادم حسین رضوی سمیت تین ملزمان کے ناقابل ضمانت وارنٹ گرفتاری جاری کردیئے۔

عدالت کی جانب سے تھانہ کھنہ میں درج تین مقدمات میں وارنٹ گرفتاری جاری کیے گئے ہیں، مقدمات میں دہشت گردی، پولیس پرتشدد، کارسرکار میں مداخلت سمیت دیگر سنگین نوعیت کی دفعات شامل ہیں۔

ان مقدمات میں خادم حسین رضوی، مولانا عنایت اللہ، ضیاء اللہ خیری اور شیخ اظہر تھانہ کھنہ پولیس کو مطلوب ہیں۔

عدالت نے ملزمان کو گرفتار کرکے پیش کرنے کا حکم دیاہے۔

واضح رہےکہ گزشتہ روز سپریم کورٹ میں بھی فیض آباد دھرنا کیس کی سماعت ہوئی جس میں آئی ایس آئی کی جانب سے 46 صفحات پر مبنی رپورٹ پیش کی گئی جس پر عدالت نے عدم اطمینان کا اظہار کیا۔