وفاق میں حکومت بنانے کیلئے پی ٹی آئی کا نمبر گیم

اسلام آباد: وفاق میں حکومت سازی کے لیے تحریک انصاف بہترین پوزیشن پر ہے لیکن اسمبلی کے حلف سے قبل 6 نشستوں خالی کرنا ہوں گی۔

عام انتخابات کے بعد قومی اسمبلی کے نتائج جاری ہوچکے ہیں جن کے مطابق پاکستان تحریک انصاف 116 نشستیں جیت چکی ہے جب کہ مسلم لیگ (ن) 64 نشستوں کے ساتھ دوسرے نمبر پر ہے۔ 

پیپلزپارٹی 43، آزاد ارکان 13 اور متحدہ مجلس عمل 12 نشتیں حاصل کرنے میں کامیاب ہوئی ہے جب کہ متحدہ قومی موومنٹ 6، بلوچستان عوامی پارٹی اور مسلم لیگ (ق) 4، 4 نشستیں جیتے ہیں۔

پنجاب میں حکومت سازی: پی ٹی آئی کے آزاد امیدواروں سے ہنگامی رابطے جاری

الیکشن کمیشن آف پاکستان کے نتائج کے مطابق ن لیگ 129 نشستوں کے ساتھ پہلے نمبر پر ہے جبکہ تحریک انصاف کا 123 نشستوں کے ساتھ دوسرا نمبر ہے

وفاق میں حکومت سازی کے لیے تحریک انصاف نے جوڑ توڑ شروع کردیا ہے اور مخلوط حکومت بنانے کے لیے چھوٹی چھوٹی جماعتوں سے رابطے کیے جا رہے ہیں۔

تحریک انصاف وفاق میں متحدہ قومی موومنٹ، بلوچستان عوامی پارٹی، پاکستان مسلم لیگ (ق) اور آزاد ارکان کے ساتھ مل کر حکومت بنانے میں کامیاب ہو جائے گی۔

تحریک انصاف کو نئی اسمبلی کے حلف سے پہلے 6 نشستوں سے ہاتھ دھونے پڑیں گے۔ پی ٹی آئی چیئرمین عمران خان 5 نشستوں پر کامیاب ہوئے ہیں اس لیے انہیں 4 نشستیں چھوڑنی پڑیں گی۔

تحریک انصاف کے چیئرمین عمران خان این اے 35 بنوں، این اے 53 اسلام آباد، این اے 95 میانوالی، این اے 131 لاہور اور این اے 243 کراچی سے جیتے ہیں لیکن انہیں اب ان میں سے ایک نشست رکھنی ہوگی۔

قومی وصوبائی اسمبلیوں کے حلقوں کے 100 فیصد نتائج جاری، پی ٹی آئی کی واضح برتری

مرکز اور خیبرپختونخوا اسمبلی میں تحریک انصاف، سندھ میں پیپلز پارٹی، پنجاب میں مسلم لیگ (ن) جبکہ بلوچستان میں بلوچستان عوامی پارٹی کو برتری حاصل ہے۔

پی ٹی آئی کے غلام سرور خان بھی دو نشستوں این اے 59 راولپنڈی اور این اے 63 راولپنڈی سے کامیاب ہوئے ہیں اس لیے انہیں بھی ایک نشست کی قربانی دینا ہوگی۔ 

تحریک انصاف کے ہی پرویز خٹک ایک قومی اور 2 صوبائی اسمبلی کی نشستیں جیتے ہیں لیکن پارٹی کی جانب سے انہیں دوبارہ وزیر اعلیٰ خیبر پختون خوا بنانے کے فیصلے کے بعد انہیں ایک صوبائی اور ایک قومی اسمبلی کی نشست چھوڑنی پڑے گی۔

موجودہ صوتحال کے مطابق قومی اسمبلی کے حلف سے پہلے 6 نشستیں خالی ہونے پر تحریک انصاف کی جنرل نشستیں 110 ہوجائیں گی لیکن ان اثر حکومت بنانے میں نہیں ہوگا۔ خالی ہوجانے والی نشستوں پر ضمنی انتخابات ہوں گے۔

پنجاب اسمبلی کی صورتحال

دوسری جانب پنجاب اسمبلی میں بھی دلچسپ صورتحال ہے اور حکومت سازی کے لیے ن لیگ اور پی ٹی آئی میں جوڑ توڑ کا عمل جاری ہے۔

پنجاب اسمبلی میں مسلم لیگ (ن) 129 نشتوں کے ساتھ پہلے اور تحریک انصاف 123 سیٹوں کے ساتھ دوسرے نمبر پر ہے۔

تخت پنجاب میں اصل گیم چینجر آزاد ارکان ہیں جن کی تعداد 29 ہے اور یہی ارکان حکومت سازی کے لیے دونوں جماعتوں کا ہدف ہیں۔