06 جون ، 2019 
جھیل سیف الملوک 5 ماہ بعد سیاحوں کیلئے کھل گئی
06 جون ، 2019
سطح سمندر سے ساڑھے 10 ہزار فٹ بلند ایشیاء کی سب سے خوبصورت جھیل سیف الملوک کے راستے کو 5 ماہ کی طویل بندش کے بعد سیاحوں کے لیے کھول دیا گیا۔
ٹورازم پروموشن ایسوسی ایشن آف کاغان ویلی کے چیئرمین سیٹھ مطیع اللہ نے جیو نیوز کو بتایا کہ سردی کے موسم میں شدید برفباری اور لینڈ سلائیڈنگ سے جھیل روڈ بند ہو جاتا ہے اورہر سال لاکھوں سیاح صرف جھیل سیف الملوک دیکھنے کے لئے ناران آتے ہیں۔
مطیع اللہ کے مطابق انہوں نے سرکاری اداروں کا انتظار کرنے کے بجائے اپنی مدد آپ کے تحت جھیل کے راستے سے تمام رکاوٹیں دور کرکے عید سے قبل ہی جھیل کو سیاحوں کے لئے کھول دیا ہے تاکہ عیدپر ناران آنیوالے سیاحوں کی خوشی دوبالا ہو جائے۔
جھیل سیف الملوک وادی کاغان میں 10578 فٹ کی بلندی پر واقع ہے اور ہر سال ہزاروں لوگ ناران سے جیپ یا پیدل اس تک پہنچتے ہیں ۔
