04 اکتوبر ، 2019 
فردوس عاشق نے وزیراعظم اور افغان طالبان کی ملاقات کی تردید کردی
04 اکتوبر ، 2019
اسلام آباد: فردوس عاشق اعوان نے افغان طالبان کے وفد کی وزیراعظم سے ملاقات کی خبروں کی تردید کردی۔
ٹوئٹر پر جاری بیان میں معاون خصوصی برائے اطلاعات فردوس عاشق اعوان نے کہاکہ طالبان وفد کے ساتھ دفتر خارجہ میں مذاکرات مفاہمتی عمل کے لیے نیک شگون ہے، پاکستان نے ہمیشہ علاقائی اور عالمی امن کیلئے مثبت ماحول پیدا کرنے میں گراں قدر کردار ادا کیا ہے۔
انہوں نے کہا کہ گزشتہ روز طالبان وفد کی وزیرخارجہ سے ملاقات اسی سلسلے کی کڑی تھی، پر امید ہیں کہ اس سے عنقریب مثبت نتائج حاصل ہوں گے۔
معاون خصوصی کا کہنا تھا کہ وزیراعظم سے طالبان وفد کی کوئی ملاقات نہیں ہوئی۔
واضح رہے کہ افغان طالبان کا 12 رکنی وفد ملا عبدالغنی برادر کی قیادت میں پاکستان کے دورے پر موجود ہے جہاں انہوں نے وزارت خارجہ میں پاکستانی حکام سے ملاقات کی جب کہ افغان طالبان کی وزیراعظم سے ملاقات کی خبریں بھی سامنے آئی تھیں۔
دفتر خارجہ کے اعلامیے کے مطابق وزیر خارجہ شاہ محمود قریشی نے کہا کہ افغان مسئلے کے جلد پرُ امن حل کیلئے تمام ممکنہ کوششیں کرنے کا وقت ہے اور افغانستان میں مستقل امن کیلئے پاکستان تمام کوششوں کی حمایت جاری رکھےگا۔
