01 نومبر ، 2019 
'یہ سب کا ایوارڈ ہے'
01 نومبر ، 2019
پاکستان ویمن کرکٹ ٹیم کی سابق کپتان ثنا میر نے ایشیا گیم چینجر ایوارڈ پوری قوم کے نام کر دیا۔
ثنا میر کو حال ہی میں امریکا کے شہر نیو یارک میں ایشیا گیم چینجر ایوارڈ سے نوازا گیا جو معاشرے کی متاثر کن شخصیات کو دیا جاتا ہے۔
ثنا میر نے ایوارڈ ملنے پر خوشی کا اظہار کیا اور کہا کہ "میرا سفر بہت طویل ہے لیکن یہ سفر میرے اکیلے کا نہیں ہے، اس سفر میں میرے ساتھ کرکٹ بورڈ، ساتھی کھلاڑی، کوچز اور گراؤنڈ اسٹاف بھی شامل ہے، اس لیے میں سمجھتی ہوں کہ یہ میرے اکیلے کا ایوارڈ نہیں ہے یہ سب کا ایوارڈ ہے ۔"
ثنا میر نے مزید کہا کہ کرکٹ کے علاوہ بھی ان کی سرگرمیوں کو سراہا گیا ہے، یہ وہ سرگرمیاں ہیں جن میں انہوں نے اپنا حصہ ڈالتے ہوئے سب کو متاثر کیا۔
ثنا میر کے مطابق ’بااثر شخصیت کے اس ٰایوارڈ کے بعد میری ذمہ داریوں میں اضافہ ہو گیا ہے ، اب میری کوشش ہو گی کہ میں نئی آنے والی لڑکیوں کے لیے راستہ آسان بناؤں تاکہ جن مشکلات کا سامنا ہمیں کرنا پڑا ہے وہ انہیں نہ کرنا پڑے ‘۔
ثنا میر نے نوجوان لڑکیوں کو کرکٹ کھیلنے کی ترغیب دیتے ہوئے کہا کہ نئی لڑکیاں آئیں اور کھیلیں تاکہ کھیل کو ترقی ملے۔ "انگلینڈ اور آسٹریلیا کی ٹیمیں اسی وجہ سے اس وقت اس مقام پر ہیں کہ ان کی سینئر کھلاڑیوں نے کھیل کے لیے بہت کچھ کیا ہے، ہمیں بھی ایسا کرنا ہے اور اپنا حصہ ڈالنا ہے ، اس سے پاکستان ویمن کرکٹ مزید آگے جائے گی۔"
ثنا میر نے بتایا کہ پاکستان کرکٹ بورڈ ویمن کرکٹ کے لیے کافی محنت کر رہا ہے لیکن ابھی مزید بہت کچھ کرنے کی ضرورت ہے۔
مزید خبریں :
ویرات کوہلی نے سنچریوں کی سنچری بناکر اہم سنگ میل عبور کر لیا
24 نومبر ، 2024
