کراچی: کتے کے کاٹنے سے ایک اور شخص ہلاک، رواں برس تعداد 20 ہوگئی
05 نومبر ، 2019
کراچی میں کتے کے کاٹنے سے ایک اور شخص زندگی کی بازی ہار گیا جس کے بعد رواں سال صوبے میں سگ گزیدگی سے ہونے والی ہلاکتوں کی تعداد 20 ہوگئی ہے۔
جیو نیوز کے مطابق کراچی کے علاقے سرجانی ٹاؤں کے رہائشی محمد سلیم کو ڈیڑھ ماہ قبل کتے نے کاٹا تھا لیکن انہیں بروقت طبی امداد فراہم نہیں کی گئی اور ایک ماہ بعد جناح اسپتال میں داخل کرایا گیا۔
جناح اسپتال کی سینئر ایگزیکٹو ڈائریکٹر سیمی جمالی کے مطابق 6 بچوں کے والد 45 سالہ محمد سلیم گزشتہ ایک ہفتے سے اسپتال میں زیر علاج تھے، ان کے دونوں ہاتھوں پر کتے کے کاٹنے کے زخم تھے۔
ڈاکٹر سیمی جمالی نے بتایا کہ محمد سلیم اسپتال منتقلی کے وقت سے ہی نیم بیہوشی میں تھے جو منگل کی صبح انتقال کر گئے۔
سیمی جمالی کے مطابق رواں برس جناح اسپتال کراچی میں کتے کے کاٹنے سے 9 افراد انتقال کرچکے ہیں۔
یاد رہے کہ گزشتہ ماہ کراچی میں کتے کے کاٹنے سے 55 سالہ حور بی بی انتقال کر گئیں تھی۔
