11 فروری ، 2020
برطانوی ملکہ الزبتھ کے سب سے بڑے نواسے پیٹر فلپس اور ان کی اہلیہ اوٹم کیلی کے درمیان علیحدگی ہوگئی۔
ملکہ الزبتھ کے نواسے کی شادی ختم ہونے کا فیصلہ ایسے وقت میں سامنے آیا ہے جب ملکہ کے پوتے شہزادہ ہیری اور ان کی اہلیہ میگھن مارکل نے شاہی خاندان سے دستبرداری اور خودمختار زندگی گزارنے کا اعلان کیا ہے۔
اس سے قبل نومبر 2019 میں ملکہ نے شہزادہ اینڈریو کو کمسن لڑکی سے جنسی تعلقات کے الزامات کا سامنا کرنے والے جیفری ایپسٹین سے دوستی پر شاہی ذمہ داریوں سے برخاست کردیا تھا۔
اب ملکہ کے نواسے کی اہلیہ سے علیحدگی کی خبر سامنے آئی ہے جس کی تصدیق شاہی خاندان کے ترجمان نے بھی کردی ہے۔
ترجمان کا کہنا ہے کہ ملکہ الزبتھ کے نواسے پیٹر فلپس اور ان کی کینیڈین اہلیہ اوٹم کیلی کے درمیان علیحدگی ہوچکی ہے اورجلد ان کے درمیان طلاق ہوجائے گی۔
خیال رہے کہ پیٹر فلپس ملکہ برطانیہ کی اکلوتی بیٹی شہزادی اینی کے پہلے شوہر مارک فلپس کے بیٹے ہیں جن کے پاس کوئی شاہی ذمہ داری نہیں ہے اور نہ ہی وہ عوامی فنڈز حاصل کرتے ہیں۔
ملکہ الزبتھ کے نواسے پیٹر فلپس اور اوٹم کیلی نے 2008 میں شادی کی تھی جس کی فوٹو البم 5 لاکھ پاؤنڈز میں مقامی میگزین کو بیچی گئی تھی جبکہ ان کی 2 بیٹیاں بھی ہیں جن کی عمریں بالترتیب 9 اور 7 سال ہیں۔
شاہی خاندان کے ترجمان نے مزید بتایاکہ جوڑے نے گزشتہ سال ہی ملکہ الزبتھ اور خاندان کے دیگر افراد کو علیحدگی سے متعلق آگاہ کردیا تھا۔
انہوں نے کہا کہ علیحدگی اختیار کرنے والے جوڑے کی سب سے پہلی ترجیح بیٹیوں کی تعلیم و تربیت ہے، دونوں خاندان علیحدگی کے اعلان پرغم زدہ ہیں لیکن مل جل کر بچوں کی نگہداشت کے والدین کے فیصلے کی مکمل تائید کرتے ہیں۔
پیٹر فلپس لگژری کار بنانے والی کمپنی ولیم جیگوار اور رائل بینک آف اسکاٹ لینڈ میں کام کرچکے ہیں اور ہانک کانگ میں رہائش پذیر ہیں جبکہ اِس وقت وہ کھیل اور انٹرٹینمنٹ کی ایجسنی چلارہے ہیں۔
واضح رہے کہ گزشتہ دنوں برطانوی شہزادہ ہیری اور ان کی اہلیہ میگھن مارکل نے شاہی خاندان کے سینئر فرد کی حیثیت سے دستبرداری کا اعلان کیا تھا جب کہ شاہی جوڑے کے ہاں 8 ماہ قبل ہی بیٹے آرچی کی پیدائش ہوئی تھی۔