پتنگ بازی پر پابندی کیخلاف درخواست پر پنجاب حکومت سے جواب طلب
19 فروری ، 2020
لاہور ہائیکورٹ نے پتنگ بازی پر پابندی کے خلاف درخواستوں پر پنجاب حکومت کو نوٹس جاری کرتے ہوئے 10 روز میں جواب طلب کرلیا۔
چیف جسٹس لاہور ہائیکورٹ جسٹس مامون رشید شیخ نے محمد علی سمیت دیگر دو شہریوں کی درخواستوں پر سماعت کی جس میں پتنگ بازی پر پابندی کو چیلنج کیا گیا۔
درخواست گزار کے وکیل خالد ظفر نے نشاندہی کی کہ پتنگ بازی پر پابندی سے اس سے منسلک افراد ایک بہت بڑی تعداد بے روزگار ہو گئے ہیں۔
درخواست گزار کے وکیل نے نکتہ اٹھایا کہ آئین کسی بھی شہری کو اپنا کاروبار کرنے کی اجازت دیتا ہے لیکن پتنگ بازی پر پابندی سے اس سے منسلک افراد کو بے روزگار کرنا آئین حقوق کی نفی ہے اور آئین کی دفعات کے منافی ہے۔
وکیل خالد ظفر نے استدعا کی کہ پتنگ بازی پر پابندی کو ختم کیا جائے تاکہ اس سے منسلک افراد کو دوبارہ روزگار ملے۔
عدالت نے درخواست گزار کی استدعا پر پنجاب حکومت کو نوٹس جاری کرکے 10 روز میں جواب طلب کرلیا۔
