12 جون ، 2020 
کورونا: لاہور میں پابندیاں مزید سخت کرنے کیلئے وفاق کو سفارشات بھیجنے کا فیصلہ
12 جون ، 2020
پنجاب حکومت نے کورونا کے بڑھتے کیسز کے باعث لاہور میں 2 ہفتے کے لیے پابندیاں مزید سخت کرنے کے لیے وفاق کو سفارشات بھیجنے کا فیصلہ کیا ہے۔
لاہور میں وزیراعلیٰ پنجاب عثمان بزدار کی زیرصدارت خصوصی اجلاس ہوا جس میں کورونا سے متعلق صورت حال کا جائزہ لیا گیا۔
صوبائی حکومت نے لاہور میں کورونا کے بڑھتے ہوئے کیسز روکنے کے لیے خصوصی اقدامات کا فیصلہ کیا ہے اور فیصلہ کیا ہے کہ اس سلسلے میں لاہور میں پابندیاں مزید سخت کرنے کے لیے وفاق کو سفارشات بھیجی جائیں گی۔
اجلاس کے دوران کورونا کی صورت حال پر بریفنگ میں بتایا گیا کہ صوبائی دارالحکومت لاہور میں کورونا کے حوالے سے ضابطہ کار ( ایس او پیز) پر عمل درآمد نہ کرنے کے بعد صورت حال تشویش ناک ہے۔
بریفنگ میں بتایا گیا کہ پنجاب میں کورونا مریضوں میں سے نصف سے زائد لاہور میں ہیں جب کہ بازاروں اور مارکیٹوں میں ایس او پیز کی خلاف ورزیاں ہورہی ہیں۔
اجلاس میں بتایا گیا کہ نیشنل ڈیزاسٹر مینجمنٹ اتھارٹی (این ی ایم اے) پنجاب میں 300 بستروں کا ہائی ڈیپینڈینسی یونٹ (ایچ ڈی یو) قائم کرے گی۔
اس موقع پر وزیراعلیٰ پنجاب نے ہدایت کی کہ کورونا مریضوں کے لیے درکار انجیکشن کی کمی نہیں ہونی چاہیے، ایک ہفتے میں 7سو انجیکشن سرکاری اسپتالوں کو فراہم کیے جائیں گے۔
خیال رہے کہ پنجاب میں کورونا سے متاثر ہ افراد کی تعداد 47 ہزار سے زائد ہوچکی ہے جن میں سے 890 افراد جاں بحق ہوچکے ہیں ۔
