نوری آباد حادثہ: ہلاکتوں کی تعداد 17 ہوگئی، واقعے کا مقدمہ درج
28 ستمبر ، 2020
نوری آباد وین حادثے میں ہلاکتوں کی تعداد 17 ہوگئی جب کہ واقعے کا مقدمہ وین ڈرائیور اور نامعلوم کار ڈرائیور کے خلاف درج کرلیا گیا۔
پولیس کے مطابق تھانہ نوری آباد کے ایس ایچ او لطیف شاہ کی مدعیت میں حادثے کا مقدمہ درج کیا گیا ہے جب کہ ایف آئی آر میں وین ڈرائیور عامر عباس اور نامعلوم کار ڈرائیور کو ملزم نامزد کیا گیا ہے۔
ایف آئی آر کے مطابق حادثہ وین اور کار کے ڈرائیوروں کے درمیان اوور اسپیڈ کے باعث پیش آیا، تیز رفتاری کے دوران کار کا بونٹ نکل کر وین میں لگا جس سے وین ڈرائیور سے گاڑی بےقابو ہوکرالٹ گئی اور وین کو آگ لگ گئی۔
جائے حادثہ پر 13 مسافر اور دوران علاج اسپتال میں 4 افراد جاں بحق ہوچکے ہیں جس سے مرنے والوں کی تعداد 17 ہوگئی جب کہ 9 زخمی زیر علاج ہیں۔
ڈی ایس پی نوری آباد نذر محمد ڈیشک کا کہنا ہے کہ وین ڈرائیور کو حراست میں لےکرتفتیش شروع کردی گئی ہے۔
