جھریاں ختم کرنے کیلئے انجیکشن لگوانے والی خاتون کا منہ ٹیڑھا ہوگیا

خوبصورتی بڑھانے کے لیے اکثر خواتین متعدد کاسمیٹکس پروسیجر کرواتی ہیں جن میں انجیکشنز اور کاسمیٹکس سرجری شامل ہوتی ہے۔

اکثر کاسمیٹکس کا یہ عمل خوفناک بھی ثابت ہوجاتا ہے اور ہمیں ساری زندگی اس غلطی کی سزا بھگتنی پڑ جاتی ہے۔

حال ہی میں چین کے شہر ہینگ ژہو سے تعلق رکھنے والی ایک خاتون نے کاسمیٹک کلینک سے چہرے کی جھریوں کو ماند کرنے کے لیے ’رنکل فلرز‘ لگوائے جس کے بعد  ان کا منہ ٹیڑھا ہوگیا۔

29 سالہ ژہاؤ نے مقامی کاسمیٹکس اسپتال سے چہرے پر جھریاں ختم کرنے والے فلرز انجیکشن لگوائے تھے جس کو لگوانے کے ایک ہفتے بعد خاتون جب صبح سو کر اٹھیں تو ان کا آدھا منہ مفلوج تھا۔

خاتون کا آدھے منہ مفلوج ہونے کی وجہ سے وہ اپنا منہ اور بائیں آنکھ ٹھیک سے بند بھی نہیں کر پا رہیں جب کہ انہیں کھانا تک چبانے میں دشواری کا سامنا ہے اور وہ پانی بھی اسٹرا کے ذریعے پی رہی ہیں۔

خاتون کا کہنا ہے کہ روزانہ جب میں اپنے چہرے کو شیشے میں اس حالت میں دیکھتی ہوں تو میرا مرنے کا دل کرتا ہے۔

ڈاکٹرز کا کہنا ہے کہ 29 سالہ چینی خاتون کو ’فیشل نیرو پیرالیسس‘ ہوا ہے اور ان کا منہ واپس پہلے کی طرح کب ہوگا اس حوالے سے کچھ کہنا قبل از وقت ہے، اسے ٹھیک ہونے میں کئی دن، ماہ یا سال لگ سکتے ہیں جب کہ ایسا بھی ہو سکتا ہے کہ خاتون کا منہ کبھی ٹھیک نہ ہو سکے۔

ژہاؤ کا کہنا ہے کہ وہ متعدد بار انجیکشنز لگوا چکی ہیں لیکن ان کے ساتھ کبھی ایسا نہیں ہوا، انہوں نے کاسمیٹک اسپتال کے خلاف مقدمہ بھی درج کرایا ہے۔