'سیکرٹ ویڈنگ': چرچ آف انگلینڈ کے سربراہ نے خاموشی توڑ دی

انگلینڈ کے شہر کینٹربری کے آرچ بشپ جسٹن ویلبی نے اس بات کی تردید کی ہے کہ میگھن مارکل اور برطانوی شہزادہ ہیری کی شادی قلعہ ونڈسر میں ہونے والی باضابطہ تقریب سے کچھ دن قبل ہوئی تھی۔

ڈچس آف سسیکس میگھن مارکل نے گزشتہ دنوں امریکی ٹی وی شو پر میزبان اوپرا ونفری کو انٹرویو میں کہا تھا کہ ان کی شادی باضابطہ تقریب سے کچھ دن پہلے ہی ایک خفیہ تقریب میں شہزادہ ہیری سے آرچ بشپ نے کرائی تھی۔

میگھن مارکل نے کہا تھا کہ'آپ کو پتا ہے شادی سے 3 دن پہلے ہی ہماری شادی ہوگئی تھی جو کہ کوئی بھی نہیں جانتا۔'

انہوں نے کہا کہ گھر کے پچھلے حصے میں ہونے والی اس شادی میں صرف وہ دونوں اور کینٹربری کے آرچ بشپ تھے۔

تاہم، رائٹرز کے مطابق کینٹربری کے آرچ بشپ جسٹن ویلبی نے اس دعوے کی تردید کر دی ہے۔

میگھن مارکل اور ملکہ برطانیہ کی دلچسپ ویڈیو سامنے آگئی

میگھن نے شاہی خاندان کو The Firmکہا تھا اور الزام لگایا تھا کہ انہیں تحفظ نہیں دیا جاتا تھا

جسٹن ویلبی کا کہنا ہے کہ قانونی شادی اس ہفتے کے دن ہی ہوئی تھی اور انہوں نے خود شادی کے سرٹیفکیٹ پر دستخط کیے تھے۔'یہ ایک جرم ہوتا ہے اگر میں ایسی چیز پر دستخط کرتا جو کہ سچ نہیں تھی۔'

جسٹن ویلبی نے شہزادہ ہیری اور میگھن کے ساتھ شادی سے قبل کئی باضابطہ اور پرائیویٹ ملاقاتوں کی تصدیق کی تاہم انہوں نے ان کی تفصیلات دینے سے انکار کر دیا۔

جسٹن ویلبی کے مطابق جب آپ ایک پادری سے گفتگو کرتے ہیں تو آپ کو امید ہوتی ہے وہ بات چیت ہمیشہ پرائیویٹ ہی رہے گی۔