28 اگست ، 2021 
کورونا ویکسین کی بوسٹر ڈوز کب سے لگے گی اور قیمت کیا ہوگی؟
28 اگست ، 2021
بیرون ملک جانے کے خواہاں افراد کورونا ویکسین کی بوسٹر ڈوز یعنی تیسری ڈوز لگواسکتے ہیں لیکن یہ مفت نہیں ہوگی اور اس کی قیمت 1270 روپے ہوگی۔
نیشنل کمانڈ اینڈ آپریشن سینٹر (این سی ا و سی) نے کورونا ویکسین کی تیسری ڈوز لگانے کی منظوری دے دی ہے جس کے بعد متعلقہ ممالک کی منظور شدہ ویکسین کی بوسٹر ڈوز یکم ستمبر سے لگائی جائے گی۔
وزرات نیشنل ہیلتھ سروسز کی طرف سے جاری نوٹیفکیشن کے مطابق بیرون ممالک جانے والوں کے لیے بوسٹر ڈوز کی قیمت 1270 روپے مقرر کی گئی ہے۔
بوسٹر ڈوز کی قیمت کی ادائیگی نیشنل بینک کی تمام برانچوں میں جمع کروائی جاسکتی ہے۔ بوسٹر ڈوز صرف منتخب کورونا ویکسین سنٹرز پر ہی لگائی جائے گی۔
علاوہ ازیں این سی او سی اعداد و شمار کے مطابق اسلام آباد میں ویکسین کی اہل آبادی میں سے 65 فیصد کو ویکسین لگائی جاچکی ہے۔
خیبر پختونخوا حکومت نے 30 فیصد آبادی کو ویکسین لگانے کا دعویٰ کیا ہے جبکہ ویکسین نہ لگوانے والوں کی موبائل سِم اور تنخواہیں بند کرنے کا اشارہ دیا ہے۔
