فرانس نے گوگل اور فیس بک پر بھاری جرمانہ کردیا

06 جنوری ، 2022

فرانس کےجرمانے کے بعد گوگل نے کوکیز کے استعمال سے متعلق تبدیلی کرنے کا اعلان کیا ہے__فوٹو فائل

فرانس نے ٹیکنالوجی کمپنی گوگل اور فیس بک پر کوکیز استعمال کرنے پر بھاری جرمانہ عائد کردیا۔

میڈیا رپورٹس کے مطابق فرانس کے نیشنل کمیشن برائے انفارمیشن ٹیکنالوجی(سی این آئی ایل) کی جانب سے گوگل پر 150 ملین یورو اور فیس بک پر 60 ملین یورو کا جرمانہ کیا گیا ہے۔

سی این آئی ایل کی سربراہ کیرن کیفر کے مطابق ان دونوں کمپنیوں نے کوکیز قبول کرنے کے مرحلے کو انتہائی آسان بنارکھا ہے جو صرف ایک کلک پر ہوجاتا ہے اور اگر کوئی صارف اسے قبول نہ کرنا چاہے تو اسے بڑی پریشانی کا سامنا کرنا پڑتا ہے۔

یہ بھی پڑھیں

انہوں نے کہا کہ دونوں کمپنیوں کے پاس اس مسئلے کے حل کے لیے تین ماہ کا وقت ہے بصورتِ دیگر تاخیر پر یومیہ ایک لاکھ یورو کے اضافی جرمانے کی ادائیگی کا سامنا کرنا پڑے گا۔

کوکیز کیا ہیں؟

بنیادی طور پر کوکیز آپ کے ڈیٹا پر مشتمل چھوٹی فائلز ہوتی ہیں، اکثر ویب سائٹ کھولنے پر آپ کے سامنے کوکیز کا ایک آپشن آتا ہے، کوکیز میں آپ کی معلومات بذریعہ ٹریکنگ شامل ہوتی ہیں،کوکیز سے ویب سائٹ کا سرور آپ کی ڈیوائس مثلاً موبائل یا لیپ ٹاپ کی پہچان کرلیتا ہے۔

کچھ ویب سائٹس کوکیز کے آپشن کو قبول کرنے کی پابندی نہیں لگاتیں جب کہ کچھ ویب سائٹ کوکیز کو قبول کرنا لازمی قرار دیتی ہیں ورنہ آپ اس سائٹ تک رسائی حاصل نہیں کر پاتے۔

تاہم فرانس کےجرمانے کے بعد گوگل نے کوکیز کے استعمال سے متعلق تبدیلی کرنے کا اعلان کیا ہے۔

گوگل کے مطابق فرانسیسی ریگولیٹری کے فیصلے کے بعد اس سیٹنگ پر نظر ثانی کی جائے گی۔