31 مئی ، 2022
29 مئی کو قتل کیے جانے والے بھارت کے معروف پنجابی گلوکار سدھو موسے والا کے ایک مداح نے اپنے پسندیدہ گلوگار کی موت کے بعد خودکشی کی کوشش کی۔
بھارتی میڈیا رپورٹس کے مطابق آنجہانی پنجابی گلوکار سدھو موسے والا کے 19 سالہ مداح اوتار سنگھ نے فینائل پی کر خودکشی کی کوشش کی تاہم اسے بروقت اسپتال منتقل کیا گیا لیکن اس کی حالت ابھی تشویش ناک ہے۔
رپورٹس کے مطابق پنجاب کے شہر موہالی کے گاؤں جند پور سے تعلق رکھنے والا اوتار سنگھ سدھو موسے والا کابہت بڑا مداح ہے، وہ ہمیشہ گلوکار کے گانے سنتا ہے اور وہی ٹی شرٹس پہنتا ہے جس پر آنجہانی گلوکار کا نام لکھا ہوتا ہے۔
بھارتی میڈیا کا کہنا ہے کہ نوجوان پرستار کو منگل کے روز سول اسپتال میں داخل کرایا گیا جہاں اس کی حالت تشویشناک ہے، لڑکے کے والدین مزدوری کرتے ہیں۔
واضح رہے کہ سدھو موسے والا کو اتوار کو ضلع مانسا کے گاؤں جواہرکے میں نامعلوم حملہ آوروں نے فائرنگ کرکے ہلاک کیا، نامعلوم افراد نے سدھو کی گاڑی پر 30 سے زائد گولیاں برسائیں۔
دوسری جانب پولیس نے دعو یٰ کیا ہے کہ سدھو موسے والا پر فائرنگ کی ذمہ داری کینیڈا سے تعلق رکھنے والے گینگ نے قبول کی ہے۔