ایپل کا نیا آئی او ایس 16 آپریٹنگ سسٹم کن آئی فون ماڈلز کے لیے دستیاب ہوگا؟

14 جون ، 2022

ایپل کے آئی فونز کے لیے نئے آپریٹنگ سسٹم آئی او ایس 16 کو ستمبر میں باضابطہ طور پر صارفین کے لیے متعارف کرایا جائے گا۔

اس آپریٹنگ سسٹم میں متعدد نئے فیچرز کو پیش کیا جارہا ہے جن کے بارے میں کمپنی نے اپنی سالانہ کانفرنس ڈبلیو ڈبلیو ڈی سی 2022 کے دوران بتایا۔

ان فیچرز میں میسجز ایپ میں بھیجے گئے میسجز کو ایڈٹ کرنا، نئے پرسنلائز ٹولز اور دوستوں سے فوٹو لائبریری شیئر کرنے کا نیا طریقہ قابل ذکر ہے۔

یہ بھی پڑھیں

مگر آئی او ایس 16 کو تمام آئی فونز پر اپ ڈیٹ کرنا ممکن نہیں ہوگا۔

ایپل کا نیا آپریٹنگ سسٹم صرف آئی فون 8 یا اس کے بعد کے ماڈلز کے لیے دستیاب ہوگا اور 2016 یا اس سے پہلے کے فونز میں اسے اپ ڈیٹ نہیں کیا جاسکے گا۔

یعنی اگر آپ آئی فون 6 ایس، آئی فون ایس ای اور آئی فون 7 استعمال کررہے ہیں تو اب آپ کے لیے ایپل کی سافٹ ویئر اپ ڈیٹس دستیاب نہیں ہوں گی۔

یہ غیرمتوقع فیصلہ نہیں کیونکہ ایپل کی جانب سے پرانی ڈیوائسز کے لیے سافٹ ویئر سپورٹ کو ہر سال ختم کیا جاتا ہے۔

مگر یہ واضح رہے کہ نئے آئی او ایس سسٹم تک رسائی ختم ہونے کے بعد بھی آپ کا پرانا آئی فون کام کرتا رہے گا، بس وہ نئے فیچرز سے محروم رہے گا۔

نئی آئی او ایس اپ ڈیٹس تک رسائی ختم ہونے سے ہیکنگ اور میل ویئر کا خطرہ بڑھتا ہے کیونکہ سافٹ ویئر اپ ڈیٹس میں بگز کی روک تھام بھی کی جاتی ہے۔