10 اگست ، 2022 
نمرہ کاظمی کو والدین کے ساتھ کیوں بھیجا؟ شوہر کا بیان سامنے آگیا
10 اگست ، 2022
تونسہ میں پسند کی شادی کرنے والی کراچی کی رہائشی نمرہ کاظمی کے بیان کے بعد اس کے شوہر شاہ رخ کا بیان بھی سامنے آگیا۔
سوشل میڈیا پر وائرل بیان میں نمرہ کاظمی کے شوہر نے کہا کہ ‘نمرہ اور میرے درمیان علیحدگی نہیں ہوئی، صرف چھوٹی موٹی لڑائی تھی جس کی وجہ سے نمرہ اپنی والدہ کے گھر جاکر رہنا چاہتی تھی، یہی وجہ تھی کہ ہم نے نمرہ کو جج کے سامنے پیش کرکے ماں باپ کے حوالے کردیا ہے‘۔
نمرہ کے شوہر کا کہنا تھا کہ ’ایسا کچھ نہیں ہے کہ میں نے نمرہ کو چھوڑا ہے یا علیحدگی ہوئی ہے‘۔
یاد رہے کہ اس سے قبل کراچی میں میڈیا سے گفتگو کرتے ہوئے نمرہ کاظمی کا کہنا تھا کہ ’میں والدین سے ملنے کے لیے شاہ رخ کےگھر سے گئی تھی، شاہ رخ ڈھونڈ رہا تھا تو اس لیے تھانے چلی گئی، شاہ رخ مجھے واپس گھر لے جانا چاہتے تھے مگر شاہ رخ کی والدہ نے مجھے ساتھ لے جانے سے منع کردیا جس پر شاہ رخ والدہ کے سامنے مجبور ہوا اور چھوڑ کر چلا گیا، میں نے شاہ رخ سے طلاق نہیں لی اور نہ الگ ہوئی ہوں‘۔
