09 جنوری ، 2023 
پرویز الٰہی کے نمبرز پورے نہیں، ن لیگ کے نمبرز آج 179 تھے، کل 189 ہوسکتے: رانا ثنا
09 جنوری ، 2023
وفاقی وزیرداخلہ رانا ثنا اللہ نے کہا ہے کہ سابق وزیراعظم عمران خان اعتماد کا ووٹ لینے پر بضدہیں لیکن وزیراعلیٰ پنجاب پرویزالٰہی اعتماد کا ووٹ لینے سے گریزاں ہیں جبکہ پنجاب اسمبلی میں ان کے پاس مطلوبہ نمبرز نہیں ہیں۔
پنجاب اسمبلی کے باہر میڈیا سے گفتگو میں راناثنا اللہ کا کہنا تھاکہ آج یہ لوگ پنجاب اسمبلی میں اپنی عددی اکثریت نہ دکھا سکے اور ہمارےپاس آج بھی رکن پورے تھے۔
انہوں نے کہا کہ پنجاب اسمبلی کا اجلاس ایسی حکومت کی طرف سے بلایا گیا جس کے پاس اکثریت نہیں، اگر ان کے پاس اکثریت ہوتی تو یہ ایوان میں دکھا دیتے، یہ کوشش کرتے رہے ان کا نمبر پورا ہوجائے، جب یہ نمبر پورا نہیں کرسکے تو اجلاس کو کل تک ملتوی کردیا گیا، ان کے پاس 186 کا مطلوبہ نمبر نہیں۔
ان کا کہنا تھاکہ کل یہ اجلاس بلا کر دوبارہ داؤ لگانے کی کوشش کریں گے مگر ان کا داؤ نہیں لگے گا، میرا پرویزالٰہی سے مطالبہ ہے ان کے پاس اکثریت نہیں وہ مستعفی ہوں، ن لیگ کے نمبرز آج 179 تھے، کل 189 ہوسکتے ہیں لہٰذا پنجاب اسمبلی اب نیا لیڈر منتخب کرے۔
وزیر داخلہ نے مطالبہ کیا کہ اعتمادکے ووٹ کے اجلاس کی صدارت پینل آف چیئرمین کا نیوٹرل بندہ کرے یا عدالت کسی کو مقرر کرے، پرویزالٰہی اعتماد کا ووٹ لینے کے بجائے مستعفی ہوں یارن آف الیکشن کی طرف جائیں، اعتمادکے ووٹ کے اجلاس کی صدارت اسپیکر سبطین خان کریں یہ قبول نہیں۔
ان کا کہنا تھاکہ حمزہ شہباز ہی وزارت اعلیٰ کے امید وار ہوں گے، اِس وقت وزیر اعلیٰ کے امیدوار کو تبدیل کرنا نقصان دہ ہوسکتا ہے، یقیناً اسٹیبلشمنٹ اس وقت کسی کی حمایت نہیں کررہی۔
عمران خان سے متعلق رانا ثنا اللہ کا کہنا تھاکہ ایک جماعت اور ایک شخص اس ملک کی سیاست پر مسلط کردیا گیاہے جس کا مقصد اسمبلیاں توڑنا نہیں، اس کا مقصد ہے پاکستان عدم استحکام کا شکار رہے، عمران خان کی رائے میں اسٹیبلشمنٹ اس وقت نیوٹرل ہوگی جب وہ ان کی حمایت کرے، وہ تمام سیاسی جماعتوں اور قوم سے لڑ رہا ہے، یہ آدمی فتنہ ہے، قوم نے ووٹ سے اس کا علاج نہ کیا تو ملک کو کسی حادثہ سے دوچار کردے گا۔
انہوں نےکہا کہ وزیرآباد کیس میں ملزم نوید ہی اصل ملزم ہے، اس کے آگے پیچھے کوئی نہیں، احسن اقبال پر بھی جس شخص نے حملہ کیا تھا وہ بھی جنونی تھا، یہ جوائنٹ انویسٹی گیشن ٹیم (جے آئی ٹی) کی جو رپورٹیں بناکر پیش کررہے ہیں وہ جعلی ہیں۔
ان کا کہنا تھاکہ فواد چوہدری ایک بہتر سیاسی سوچ رکھتے ہیں مگر ان کی سنتا کوئی نہیں۔
