03 فروری ، 2023
اقوام متحدہ میں پاکستان کے مستقل مندوب منیر اکرم کو افغان طالبان کی جانب سے لڑکیوں کی تعلیم پر پابندی کو پشتون ثقافت قرار دینا مہنگا پڑگیا۔
سوشل میڈیا پر صارفین نے منیر اکرم کے بیان کو شدید تنقید کا نشانہ بناتے ہوئے کہا کہ لڑکیوں کی تعلیم پر پابندی پشتون ثقافت نہیں بلکہ طالبانی کلچر ہے۔
واضح رہے کہ پاکستان کے مستقل مندوب منیر اکرم نے اقوام متحدہ میں افغانستان کے بارے میں بریفنگ دیتے ہوئے بیان دیا تھا کہ طالبان حکومت کی جانب سے خواتین کی تعلیم پر پابندیوں کا تعلق مذہبی نقطہ نظر سے زیادہ پشتون ثقافت سے ہے۔
انہوں نے کہا تھا کہ پشتون ثقافت میں خواتین کا گھر میں رہنا ضروری ہے اور یہ ثقافتی حقیقت سیکڑوں سال سے نہیں بدلی ہے۔