شاہد آفریدی نے ایک بار پھر دامادکے دفاع میں شعیب کو ازراہ مذاق آڑے ہاتھوں لےلیا

فاسٹ بولر شاہین شاہ آفریدی کے سسر اور سابق کپتان شاہد آفریدی نے  ایک بار پھر داماد کے دفاع میں بولتے ہوئے شعیب کو ازراہ مذاق آڑے ہاتھوں لے لیا ۔

پاکستان ٹیم کے سابق اسٹارز لیجنڈ لیگ کرکٹ کیلئے قطر میں موجود ہیں اس دوران کی ایک ویڈیو سوشل میڈیا پر وائرل ہے ، ویڈیو میں ایشیا لائنز کے شاہد آفریدی، مصباح الحق اور  شعیب اختر سمیت کئی کھلاڑیوں کو بس میں سفر کرتے دیکھا جاسکتا ہے۔

اس دوران شاہد آفریدی ہنستے ہوئے مصباح کو بتاتے ہیں کہ شعیب اختر نے ایک انٹرویو میں شاہین کیلئے کہا تھا کہ اگر میں شاہین کی جگہ ہوتا تو میں یہ کرتا میں وہ کرتا ، جس پر میں نے کہا تھا کہ کوئی شک نہیں شعیب نے کرکٹ کیلئے بہت کچھ برداشت کیا ہے، بلکہ یہ کہوں گا کہ شعیب نے پاکستان کیلئے بہت کچھ برداشت کیا ہے۔

شاہد نے اپنی بات جاری رکھتے ہوئے مزید کہا کہ شعیب بھائی نے اتنے انجیکشن لگوالیے اب ان سے چلا ہی نہیں جارہا ، اب شعیب بھائی سے چلا ہی نہیں جاتا پلستر ہی نہیں اترتا ان کے پیر سے۔

شاہد کی بات پر شعیب اختر اور مصباح سمیت بس میں موجود تمام کھلاڑی ہنسنا شروع ہوگئے۔

شعیب اختر نے شاہین سے متعلق کہا کیا تھا؟

کچھ عرصہ قبل  نجی ٹی وی کو دیے گئے انٹرویو کے دوران میزبان کے سوال پر شعیب اختر نے ورلڈکپ میں شاہین شاہ کی انجری سے متعلق گفتگو کرتے ہوئےکہا تھا کہ ’اگر میں شاہین کی جگہ ہوتا اور اس وقت میرے پاس 12 منٹ اور 12 گیندیں ہوتیں تو میں ان 12 گیندوں سے پاکستان کی سب سے بڑی سیلیبرٹی بن جاتا، میں قوم کا ہیرو بن جاتا‘۔

اگر ورلڈکپ میں شاہین کی جگہ میں ہوتا تو گھٹنا تڑوالیتا لیکن 12 گیندیں کرواتا: شعیب

یہ وہ لمحہ تھا جہاں آپ سپر اسٹار بن سکتے تھے، اگر میں اس روز شاہین کی جگہ ہوتا تو میں پاکستان کیلئے مرجاتا: سابق کرکٹر کی گفتگو

سابق کرکٹر کا کہنا تھا’ اس روز میں ایک گیند کرتا اس کے بعد آکر گرتا، میرا گٹھنا ٹوٹتا میرا منہ زمین پر لگتا، میرے منہ سے خون آرہا ہوتا لیکن میں پھر کھڑا ہوتا میں انجیکشن لگواتا، گٹھنے کو سن کرتا، پھرگرتا، پھر اٹھتا، پھر آتا اور پھر گرتا، لوگ مجھے کہتے تم گرجاؤ گے تمہارا گٹھنا ٹوٹ جائےگا، میں کہتا میرے لیے مرجانا بہتر ہے اس وقت لیکن ورلڈکپ ہاتھ سے نہ جائے‘۔

شعیب کی شاہین پر تنقید، شاہد آفریدی داماد کی حمایت میں سامنے آ گئے

شعیب اختر نے بہت انجیکشنز لگوائے ہیں اسی وجہ سے تو وہ آج چل بھی نہیں سکتا: شاہد آفریدی

واضح رہے کہ ورلڈکپ کے فائنل میچ کے دوران کیچ لیتے ہوئے شاہین آفریدی کا گھٹنا زمین پر لگا تھا جس کے بعد شاہین آفریدی اپنا اوور مکمل نہیں کرسکے تھے وہ 16 ویں اوور کی ایک گیند کراکر میدان سے باہر چلے گئے جس کے بعد باقی اوور افتخار احمد نے مکمل کیا تھا۔