مارک زکربرگ سے فائٹ کہاں ہوگی؟ ایلون مسک نے جگہ کا نام بتا دیا

ایکس (ٹوئٹر)، ٹیسلا اور اسپیس ایکس کے مالک ایلون مسک نے میٹا کے چیف ایگزیکٹو مارک زکربرگ سے اپنی کیج فائٹ کا مقام بتا دیا ہے۔

ویسے انہوں نے اس کیج فائٹ کی تاریخ کا اعلان تو نہیں کیا مگر دیگر تفصیلات ضرور ایکس میں مختلف پوسٹس کے دوران شیئر کیں۔

ایلون مسک نے اپنی پوسٹ میں فائٹ کے بارے میں بتاتے ہوئے لکھا کہ 'اس فائٹ کا انتظام میری اور زکربرگ کی فاؤنڈیشنز سنبھالیں گی (یو ایف سی نہیں)، اسے ایکس اور میٹا پلیٹ فارم پر لائیو اسٹریم کیا جائے گا'۔

انہوں نے فائٹ کا مقام بھی بتایا جو اٹلی کے دارالحکومت روم کا تاریخی اکھاڑہ اور دنیا کے 7 جدید تعمیراتی عجائبات میں شامل کولوزیئم ہوگا۔

ایلون مسک نے بتایا کہ انہوں نے اس حوالے سے اٹلی کی وزیراعظم Giorgia Meloni اور وزیر ثقافت سے بھی بات ہے کہ اور وہ اس کے لیے راضی ہو گئے ہیں۔

ان کا کہنا تھا کہ فائٹ سے اکٹھی ہونے والی تمام رقم ریٹائرڈ فوجیوں کی فلاح و بہبود کے لیے خرچ کی جائے گی۔

ٹیسلا کے مالک نے ایم آر آئی اور اپنی جسمانی حالت کے بارے میں بھی بتاتے ہوئے کہا کہ ایم آر آئی ٹیسٹ میں سب کچھ ٹھیک رہا، مگر دائیں کندھے کی معمولی سرجری کی ضرورت ہوسکتی ہے، جس سے ریکوری میں چند ماہ لگیں گے۔

اس سے قبل 7 اگست کو ایلون مسک نے کہا تھا کہ 'فائٹ کی تاریخ ابھی طے نہیں ہوئی، کل میں اپنی گردن اور بالائی کمر کا ایم آر آئی کروا رہا ہوں'۔

ایلون مسک کا کہنا تھا کہ شاید فائٹ سے قبل سرجری کی ضرورت ہو، اس کا علم رواں ہفتے ہو جائے گا۔

ان کا یہ میسج اس وقت سامنے آیا جب انہوں نے 6 اگست کو کہا تھا کہ یہ فائٹ ہوکر رہے گی اور اسے ایکس پر لائیو اسٹریم کیا جائے گا۔

مارک زکربرگ بھی کیج فائٹ کے لیے تیار، ایلون مسک کا پہلے ایم آر آئی کرانے کا فیصلہ

تھریڈز پر اپنے میسج میں مارک زکربرگ نے کہا تھا کہ وہ ایلون مسک سے آج ہی لڑنے کے لیے تیار ہیں۔

ٹیسلا کے مالک کے اس بیان پر مارک زکربرگ نے بھی ایکس کی حریف ایپ تھریڈز پر اپنے میسج میں کہا تھا کہ وہ ایلون مسک سے آج ہی لڑنے کے لیے تیار ہیں۔

انہوں نے کہا کہ اگرچہ وہ کیج فائٹ کے لیے 26 اگست کی تاریخ تجویز کر چکے ہیں مگر ایلون مسک نے تصدیق نہیں کی۔

اس تھریڈز پوسٹ میں مارک زکربرگ نے ایلون مسک کی ایکس پوسٹ کا اسکرین شاٹ بھی لگایا تھا، جس میں کہا گیا تھا کہ وہ فائٹ کی تیاری کے لیے وزن اٹھا رہے ہیں۔

ایلون مسک کی جانب سے ایکس پر فائٹ کو لائیو اسٹریم کیے جانے پر مارک زکربرگ کا کہنا تھا کہ اس کے لیے زیادہ قابل اعتبار پلیٹ فارم استعمال ہونا چاہیے جہاں واقعی فلاحی کاموں کے لیے فنڈز اکٹھے ہوتے ہیں (خیال رہے کہ انسٹاگرام اور فیس بک پر فنڈ جمع کرنے کا فیچر موجود ہے مگر ایکس میں نہیں)۔

میٹا کے چیف ایگزیکٹو نے مزید کہا کہ وہ اس کھیل سے محبت کرتے ہیں اور لوگوں سے مقابلہ کرنا جاری رکھیں گے۔

ایلون مسک کا ایک بار پھر مارک زکربرگ سے کیج فائٹ کا عندیہ

ایلون مسک کے مطابق مارک زکربرگ سے مجوزہ کیج فائٹ ان کے سوشل میڈیا پلیٹ فارم پر لائیو اسٹریم کی جائے گی۔

خیال رہے کہ 20 جون کو ایلون مسک نے ٹوئٹر پر ایک صارف کی ٹوئٹ پر جواب دیتے ہوئے بظاہر مذاق میں مارک زکربرگ کو فائٹ کا چیلنج کیا تھا۔

جو جسٹو مارشل آرٹ کے ماہر مارک زکربرگ نے بھی 21 جون اس چیلنج کو قبول کرتے ہوئے انسٹاگرام اسٹوری میں لکھا کہ 'مجھے لوکیشن بھیجیں'۔

جس پر ایلون مسک نے اپنے جواب میں لاس ویگاس میں موجود وینیو Vegas Octagon کے بارے میں لکھا، یہ وہ جگہ ہے جہاں ایم ایم اے فائٹس ہوتی ہیں۔

اس کے چند دن بعد ایلون مسک نے بتایا تھا کہ انہوں نے کیج فائٹ کے لیے تربیت شروع کر دی ہے، مگر پھر اس حوالے سے کوئی اپ ڈیٹ سامنے نہیں آئی۔