17 اگست ، 2023 
رانی پور میں بچی کی ہلاکت، مجسٹریٹ کو پوسٹ مارٹم کیلئے قبرکشائی کا آرڈر جاری کرنیکا حکم
17 اگست ، 2023
رانی پور میں مقامی پیر کی حویلی میں 10 سال کی ملازمہ پر مبینہ تشدد سے ہلاکت کے کیس میں ایڈیشنل سیشن جج خیرپور نے مجسٹریٹ رانی پور کو بچی کے پوسٹ مارٹم کے لیے قبرکشائی کا آرڈر جاری کرنے کا حکم دے دیا۔
پولیس نے ایڈیشنل سیشن جج خیر پور کو بچی کی قبرکشائی اور پوسٹ مارٹم کے لیے درخواست جمع کرائی تھی جس میں کہا گیا تھا۔
عدالت نے گرفتار ملزم اسد شاہ کو 4 روزہ جسمانی ریمانڈ پر پولیس کے حوالے کر دیا تاہم مقدمے میں نامزد ملزم کی اہلیہ اب تک گرفتار نہ ہو سکی جبکہ جرم چھپانے اور غفلت برتنے پر ایس ایچ او رانی پور امیر چانگ اور ڈاکٹر عبدالفتح میمن سے تحقیقات جاری ہیں۔
عدالت میں بیان دیتے ہوئے ملزم اسد شاہ نے کہا کہ وائرل ویڈیوز میری حویلی کی ہیں لیکن بچی پر تشدد نہیں کیا، حویلی کی ویڈیوز میں نے خود پولیس کو دی تھیں۔
اسد شاہ نے عدالت میں کہا کہ ہماری حویلی میں بچیاں کام کاج کرتی ہیں، مرید خوشی سے بچیاں کام پر لگاتے ہیں۔
ایس ایس پی روحیل کھوسو کا کہنا ہے کہ مجسٹریٹ رانی پور ایم ایس سول اسپتال کو قبر کشائی کرکے پوسٹ مارٹم کرنے کے لیے تحریری آرڈر جاری کریں گے۔
ایس ایس پی خیرپور نے بتایا کہ ایم ایس سول اسپتال میڈیکل بورڈ کے لیے محکمہ صحت کو تحریری لیٹر لکھیں گے، میڈیکل بورڈ قبر کشائی کے بعد پوسٹ مارٹم کرے گی۔
