سائنس و ٹیکنالوجی

آئی فون 15 میں برسوں بعد ایک بہت بڑی تبدیلی متعارف ہوگی

ویب ڈیسک

21 اگست ، 2023

آئی فون 15 سیریز ستمبر میں متعارف ہوگی / فوٹو بشکریہ forbes

ایپل کے نئے آئی فونز ستمبر میں کسی وقت متعارف کرائے جائیں گے۔

آئی فون 15 سیریز میں برسوں بعد ایپل کی جانب سے ایک بہت بڑی تبدیلی کی جا رہی ہے۔

یہ تبدیلی یو ایس بی چارجنگ پورٹ کی شکل میں نظر آئے گی جو 11 سال پرانی لائٹننگ پورٹ کی جگہ لے گی۔

مگر ایپل کی جانب سے محض چارجنگ پورٹ کو ہی تبدیل نہیں کیا جا رہا بلکہ چارجنگ اسپیڈ کو بھی بہتر بنایا جا رہا ہے۔

یہ بھی پڑھیں

کم از کم آئی فون 15 پرو ماڈلز کو گزشتہ سال کے ماڈلز کے مقابلے میں زیادہ تیزی سے چارج کرنا ممکن ہوگا۔

نئی لیکس کے مطابق آئی فون 15 سیریز کے ماڈلز کو 35 واٹس چارجر سے چارج کرنا ممکن ہوگا۔

خیال رہے کہ آئی فون 14 پرو اور 14 پرو میکس کے لیے 27 واٹس جبکہ آئی فون 14 کے لیے 20 واٹس چارجر کی سپورٹ دی گئی تھی۔

ایک 20 واٹس کا چارجر آئی فون 14 کو ایک گھنٹے میں مکمل چارج کر دیتا ہے۔

یعنی 35 واٹس چارجر سے آئی فون 15 سیریز کو کم وقت میں چارج کرنا ممکن ہوگا۔

خیال رہے کہ آئی فون 15، 15 پلس، 15 پرو اور 15 پرو میکس (یا آئی فون 15 الٹرا) کو ستمبر میں متعارف کرائے جانے کا امکان ہے۔

آئی فون 15 اور آئی فون 15 پرو میں 6.1 انچ جبکہ آئی فون 15 پلس اور آئی فون 15 پرو میکس میں 6.7 انچ کا ڈسپلے دیا جائے گا۔

اس سال آئی فون 15 سیریز کے تمام ماڈلز کے ڈسپلے میں آئی لینڈ ڈیزائن کو اپنایا جائے گا۔

2022 میں صرف آئی فون 14 پرو اور 14 پرو میکس میں آئی لینڈ ڈیزائن فرنٹ کیمرے کے لیے استعمال کیا گیا تھا جبکہ باقی دونوں ماڈلز میں نوچ ڈیزائن موجود تھا۔